ਸ੍ਰੀ ਚਮਕੌਰ ਸਾਹਿਬ, 18 ਸਤੰਬਰ(ਪਰਮਜੀਤ ਕੌਰ)- ਗੌਰਮਿੰਟ ਟੀਚਰਜ਼ ਯੂਨੀਅਨ ਪੰਜਾਬ ਨੇ ਜਿਲਾ ਸਿੱਖਿਆ ਅਫਸਰ(ਸੈਡੰਕਰੀ ਸਿੱਖਿਆ) ਰੂਪਨਗਰ ਵੱਲੋਂ ਅਧਿਆਪਕ ਮਸਲਿਆਂ ਸੰਬੰਧੀ ਮੀਟਿੰਗ ਸੱਦ ਕੇ ਆਪ ਦਫਤਰ ਵਿੱਚੋਂ ਚਲੇ ਜਾਣ ਦਾ ਸਖਤ ਨੋਟਿਸ ਲੈਦਿਆਂ ਅਗਲੇ ਹਫਤੇ ਡੀ. ਈ. ਉ. ਸੈਕੰਡਰੀ ਦਾ 23 ਤਰੀਕ ਨੂੰ ਘਿਰਾਉ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਜਾਣਕਾਰੀ ਪ੍ਰੈਸ ਬਿਆਨ ਰਾਹੀਂ ਜਥੇਬੰਦੀ ਦੇ ਆਗੂਆਂ ਸੁਰਨੈਬ ਸਿੰਘ ਜੇਤੇਵਾਲ, ਧਰਮਿੰਦਰ ਸਿੰਘ ਭੰਗੂ, ਗੁਰਪ੍ਰੀਤ ਸਿੰਘ ਹੀਰਾ ਅਤੇ ਗੁਰਬਿੰਦਰ ਸਿੰਘ ਨੇ ਇੱਥੇ ਜਾਰੀ ਪ੍ਰੈਸ ਬਿਆਨ ਰਾਹੀਂ ਦਿੱਤੀ। ਆਗੂਆਂ ਨੇ ਦੱਸਿਆ ਕਿ ਉੱਕਤ ਅਧਿਕਾਰੀ ਵੱਲੋਂ ਜਥੇਬੰਦੀ ਵੱਲੋਂ ਭੇਜੇ ਏਜੰਡੇ ਤੇ ਪਹਿਲਾਂ ਤਾਂ ਵਾਰ-ਵਾਰ ਦਿੱਤਾ ਸਮਾਂ ਬਦਲਣ ਤੋਂ ਬਾਅਦ 13 ਸਤੰਬਰ ਨੂੰ ਦੁਪਿਹਰ ਬਾਅਦ ਮੀਟਿੰਗ ਬੁਲਾ ਲਈ ਸੀ ਪਰ ਜਦੋਂ ਜਥੇਬੰਦੀ ਦੇ ਆਗੂ ਮਿੱਥੇ ਸਮੇਂ ਤੇ ਦਫਤਰ ਪੁੱਜੇ ਤਾਂ ਪਤਾ ਲੱਗਾ ਕਿ ਡੀ. ਈ. ਉ ਸਾਹਿਬ ਤਾਂ ਨੰਗਲ ਚਲੇ ਗਏ ਹਨ।ਆਗੂਆਂ ਨੇ ਕਿਹਾ ਕਿ ਅਧਿਆਪਕ  ਮਸਲਿਆਂ ਤੇ ਗੱਲਬਾਤ ਤੋਂ ਭੱਜਣ ਵਾਲੇ ਇਸ ਅਧਿਕਾਰੀ ਵਿਰੁੱਧ ਵੱਡਾ ਰੋਸ ਐਕਸ਼ਨ ਕੀਤਾ ਜਾਵੇਗਾ। ਇਸ ਮੌਕੇ ਉਨ੍ਹਾਂ ਦੇ ਨਾਲ ਸੁਰਜੀਤ ਸਿੰਘ ਬਲਾਕ ਪ੍ਰਧਾਨ ਚਮਕੌਰ ਸਾਹਿਬ, ਅਵਤਾਰ ਸਿੰਘ, ਹਰਬੰਸ ਸਿੰਘ ਬੈਂਸ, ਸ਼ੀਸ਼ਪਾਲ ਨੰਗਲ, ਕੁਲਦੀਪ ਸਿੰਘ, ਅਮਰੀਕ ਸਿੰਘ ਨੂਰਪੁਰ ਬੇਦੀ ਸਮੇਤ ਸਾਰੇ ਬਲਾਕ ਪ੍ਰਧਾਨ ਹਾਜਰ ਸਨ।

Share this post