ਪਟਿਆਲਾ, 17 ਸਤੰਬਰ (ਅਸ਼ੋਕ ਵਰਮਾ) - ਸਮੈਕ ਦੇ ਮਾਮਲੇ ’ਚ ਵਧੀਕ ਸੈਸ਼ਨ ਜੱਜ ਮਾਨਯੋਗ ਅਰਚਨਾ ਪੁਰੀ ਦੀ ਅਦਾਲਤ ਨੇ ਦੋਸ਼ੀ ਆਸ਼ੂ ਕੁਮਾਰ ਉਰਫ ਰਿੰਕੂ ਵਾਸੀ ਪਿਛੇ ਫਲੋਰ ਮਿਲ ਕਰਨਾਲ ਰੋਡ ਅੰਬਾਲਾ ਕੈਂਟ ਅਤੇ ਦੋਸ਼ੀ ਰਾਜਪਾਲ ਉਰਫ ਰਾਜੂ ਵਾਸੀ ਪਾਇਲ ਲੁਧਿਆਣਾ ਨੂੰ ਦੋਸ਼ੀ ਕਰਾਰ ਦਿੰਦੇ ਹੋਏ 10-10 ਸਾਲ ਕੈਦ ਦੀ ਸ਼ਖਤ ਸਜ਼ਾ ਸੁਣਾਈ ਹੈ। ਅਦਾਲਤ ਨੇ ਉਕਤ ਦੋਨਾ ਦੋਸ਼ੀਆਂ ਨੂੰ 1-1 ਲੱਖ ਰੁਪਏ ਜੁਰਮਾਨਾ ਕੀਤਾ ਹੈ। ਜੁਰਮਾਨਾ ਨਾ ਭਰਨ ਦੀ ਸੂਰਤ ਵਿੱਚ ਉਕਤ ਦੋਸ਼ੀਆਂ ਨੂੰ ਦੋ-ਦੋ ਸਾਲ ਦੀ ਵੱਖਰੀ ਸਜ਼ਾ ਭੁਗਤਨੀ ਪਏਗੀ। ਅਦਾਲਤ ਨੇ ਇਸ ਮਾਮਲੇ ’ਚ ਕਥਿਤ ਤੌਰ ’ਤੇ ਸ਼ਾਮਲ ਤੀਜੇ ਕਥਿਤ ਦੋਸ਼ੀ ਦਿਵਾਕਰ ਸ਼ਰਮਾ ਵਾਸੀ ਯੂ. ਪੀ ਨੂੰ ਬਚਾਅਪੱਖ ਦੇ ਸੀਨੀਅਰ ਵਕੀਲਾਂ ਐਸ. ਐਸ. ਸੱਗੂ ਅਤੇ ਬੀ. ਐਸ ਭੁੱਲਰ ਦੀਆਂ ਦਲੀਲਾਂ ਮੰਨਦੇ ਹੋਏ ਬਰੀ ਕਰ ਦਿੱਤਾ ਹੈ। ਪੁਲਿਸ ਪਾਰਟੀ ਨੂੰ ਗੁਪਤ ਸੂਚਨਾ ਮਿਲੀ ਸੀ ਕਿ ਹਰਿਆਣਾ ਖੇਤਰ ਵਿਚੋਂ ਕੁਝ ਤਸਕਰ ਸਮੈਕ ਲਿਆ ਕੇ ਪੰਜਾਬ ਦੇ ਵੱਖ-ਵੱਖ ਖੇਤਰਾਂ ਵਿੱਚ ਸਪਲਾਈ ਕਰਨ ਦੀ ਤਾਕ ਵਿੱਚ ਹਨ ਅਤੇ ਅੱਜ ਵੀ ਭਾਰੀ ਮਾਤਰਾ ਵਿੱਚ ਸਮੈਕ ਲੈ ਕੇ ਆ ਰਹੇ ਹਨ। ਪੁਲਿਸ ਨੇ ਪਿੰਡ ਮਸੀਂਗਣ ਦੇ ਨਜ਼ਦੀਕ ਸੜਕ ਉਪਰ ਨਾਕਾਬੰਦੀ ਕੀਤੀ ਹੋਈ ਸੀ ਤਾਂ ਉਸੇ ਸਮੇਂ ਪੁਲਿਸ ਨੇ ਇੱਕ ਮਾਰੂਤੀ ਕਾਰ ਨੂੰ ਆਉਂਦੇ ਦੇਖਿਆ ਅਤੇ ਪੁਲਿਸ ਪਾਰਟੀ ਨੇ ਉਸ ਕਾਰ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ। ਕਾਰ ਨੂੰ ਦੋਸ਼ੀ ਆਸ਼ੂ ਕੁਮਾਰ ਚਲਾਅ ਰਿਹਾ ਸੀ। ਦੋਸ਼ੀ ਰਾਜਪਾਲ ਦਾ ਹਰਿਆਣਾ ਖੇਤਰ ਵਿੱਚ ਇੱਕ ਢਾਬਾ ਸੀ। ਪੁਲਿਸ ਨੇ ਦੋਨਾ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਕੇ ਉਨ੍ਹਾ ਦੇ ਕਬਜ਼ੇ ’ਚੋਂ ਇੱਕ ਕਿਲੋ ਸਮੈਕ ਬਰਾਮਦ ਕੀਤੀ ਸੀ ਅਤੇ ਪੁਲਿਸ ਨੇ 5 ਸਤੰਬਰ 2009 ਨੂੰ ਥਾਣਾ ਜੁਲਕਾਂ ਵਿੱਚ ਧਾਰਾ 21, 61, 85 ਐਨ. ਡੀ. ਪੀ. ਐਸ ਐਕਟ ਦੇ ਤਹਿਤ ਮਾਮਲਾ ਦਰਜ ਕੀਤਾ ਸੀ।

Share this post