ਮੁੰਬਈ-ਅ.ਬ-ਪਿਛਲੇ 17 ਸਾਲਾਂ ਵਿਚ ਬੀ.ਐਮ.ਸੀ ’ਤੇ ਰਾਜ ਕਰਨ ਵਾਲੀ ਸ਼ਿਵਸੈਨਾ ਇਕ ਵਾਰ ਮੁੜ ਤੋਂ ਮੁੰਬਈ ਉਤੇ ਰਾਜ ਕਰਨ ਲਈ ਤਿਆਰ ਹੈ। ਬੀ.ਐਮ.ਸੀ ਦੀਆਂ ਸਾਰੀਆਂ 227 ਸੀਟਾਂ ਦੇ ਨਤੀਜੇ ਆਉਣ ਤੋਂ ਬਾਅਦ ਸ਼ਿਵਸੈਨਾ-ਭਾਜਪਾ ਗਠਜੋੜ ਨੂੰ 106 ਸੀਟਾਂ ਮਿਲੀਆਂ ਹਨ। ਮੌਜੂਦਾ ਮੇਅਰ ਸ਼ਰਧਾ ਜਾਧਵ ਫਿਰ ਤੋਂ ਚੋਣ ਜਿੱਤ ਗਏ ਹਨ।  ਸ਼ਿਵਸੈਨਾ-ਭਾਜਪਾ ਗਠਜੋੜ

ਬਹੁਮਤ ਤੋਂ ਸਿਰਫ਼ 8 ਸੀਟਾਂ ਦੂਰ ਰਿਹਾ। ਬਹੁਮਤ ਲਈ 114 ਸੀਟਾਂ ਦੀ ਲੋੜ ਹੁੰਦੀ ਹੈ। ਸ਼ਿਵਸੈਨਾ ਨੂੰ 75, ਭਾਜਪਾ ਨੂੰ 30 ਸੀਟਾਂ ਮਿਲੀਆਂ ਹਨ। ਜਦੋਂ ਕਿ ਸਹਿਯੋਗੀ ਆਰ.ਪੀ.ਆਈ ਨੂੰ ਸਿਰਫ ਇਕ ਸੀਟ ਹੀ ਹਾਸਿਲ ਹੋਈ ਹੈ।  ਦੂਸਰੇ ਪਾਸੇ ਕਾਂਗਰਸ-ਐਨ.ਸੀ.ਪੀ ਗਠਜੋੜ ਨੂੰ ਇਨ੍ਹਾਂ ਚੋਣਾਂ ਵਿਚ ਵੱਡਾ ਝਟਕਾ ਲੱਗਿਆ ਹੈ। ਇਸ ਗਠਜੋੜ ਨੂੰ ਸਿਰਫ 66 ਸੀਟਾਂ ਮਿਲੀਆਂ ਹਨ। ਕਾਂਗਰਸ ਨੂੰ 48 ਜਦੋਂ ਕਿ ਐਨ.ਸੀ.ਪੀ ਨੂੰ ਸਿਰਫ 18 ਸੀਟਾਂ ਮਿਲੀਆਂ ਹਨ।  ਇਨ੍ਹਾਂ ਚੋਣਾਂ ਵਿਚ ਮਨਸੇ ਪ੍ਰਮੁੱਖ ਰਾਜ ਠਾਕਰੇ ਨੇ ਆਪਣੇ ਚਾਚਾ ਅਤੇ ਸ਼ਿਵਸੈਨਾ ਪ੍ਰਮੁੱਖ ਨੂੰ ਆਪਣੀ ਤਾਕਤ ਦਿਖਾ ਦਿੱਤੀ ਹੈ। ਬੀ.ਐਮ.ਸੀ ਚੋਣਾਂ ਵਿਚ ਮਨਸੇ ਵੱਡੀ ਤਾਕਤ ਦੇ ਰੂਪ ਵਿਚ ਉਭਰੀ ਹੈ। ਮਨਸੇ ਦੇ ਖਾਤੇ ਵਿਚ 27 ਸੀਟਾਂ ਗਈਆਂ ਹਨ।  ਜ਼ਿਕਰਯੋਗ ਹੈ ਕਿ ਬੀ.ਐਮ.ਸੀ ਚੋਣਾਂ ਵਿਚ ਕੁੱਲ 2232 ਉਮੀਦਵਾਰ ਉਤਰੇ ਸਨ। ਸ਼ਿਵਸੈਨਾ ਨੇ 135, ਭਾਜਪਾ ਨੇ 63 ਸੀਟਾਂ ਉਤੇ ਆਪਣੇ ਉਮੀਦਵਾਰ ਉਤਰੇ ਸਨ। ਕਾਂਗਰਸ ਨੇ 170 ਅਤੇ ਉਸ ਦੇ ਸਹਿਯੋਗੀ ਐਨ.ਸੀ.ਪੀ ਨੇ 57 ਸੀਟਾਂ ’ਤੇ ਉਮੀਦਵਾਰ ਖੜ੍ਹੇ ਕੀਤੇ ਸਨ। ਜਦੋਂ ਕਿ ਮਨਸੇ ਨੇ 223 ਸੀਟਾਂ ਉਤੇ ਆਪਣੇ ਉਮੀਦਵਾਰ ਚੋਣ ਮੈਦਾਨ ਵਿਚ ਉਤਾਰੇ ਸਨ।

Share this post