ਨਵੀਂ ਦਿੱਲੀ, (ਅ.ਬ.)-ਖੁਰਾਕੀ ਵਸਤੂਆਂ ਦੇ ਮੁੱਲ ਘੱਟਣ ਨਾਲ ਸਿੱਕੇ ਦੇ ਪਾਸਾਰ ਦੀ ਦਰ ਜਨਵਰੀ ਮਹੀਨੇ ਵਿੱਚ ਘੱਟ ਕੇ 6.55 ਪ੍ਰਤੀਸ਼ਤ ਉੱਤੇ ਆ ਗਈ। ਇਹ ਪਿਛਲੇ ਦੋ ਸਾਲਾਂ ਦੀ ਸਭ ਤੋਂ ਨੀਵੇਂ ਪੱਧਰ ਦੀ ਦਰ ਹੈ। ਮਹਿੰਗਾਈ ਦਰ ਘੱਟਣ ਨਾਲ ਸੰਭਾਵਨਾ ਬਣੀ ਹੈ ਕਿ ਭਾਰਤੀ ਰਿਜ਼ਰਵ ਬੈਂਕ ਆਉਂਦੇ ਮਹੀਨੇ ਵਿੱਚ ਨੀਤੀਗਤ ਬਜ਼ਾਰ ਦਰਾਂ ਵਿੱਚ ਕਟੌਤੀ ਕਰ ਸਕਦਾ ਹੈ। ਥੋਕ ਮੁੱਲ ਸੂਚਕ ਅੰਕ ਅਧਾਰਿਤ ਮੁਦਰਾ

ਪਾਸਾਰ ਦਸੰਬਰ ਵਿੱਚ 7.47 ਪ੍ਰਤੀਸ਼ਤ ਦੇ ਪੱਧਰ ਉੱਪਰ ਸੀ, ਜਦੋਂਕਿ ਜਨਵਰੀ 2011 ਵਿੱਚ ਇਹ 9.47 ਫੀਸਦੀ ਸੀ। ਮੁਦਰਾ ਪਾਸਾਰ ਦੀ ਇਹ ਦਰ ਦਸੰਬਰ 2009 ਦੇ ਬਾਅਦ ਸਭ ਤੋਂ ਘੱਟ ਉਸ ਸਮੇਂ ਇਹ 7.15 ਪ੍ਰਤੀਸ਼ਤ ਸੀ।  ਇਸ ਦੌਰਾਨ ਵਿੱਤ ਮੰਤਰੀ ਪ੍ਰਣਬ ਮੁਖਰਜੀ ਨੇ ਕਿਹਾ ਹੈ ਕਿ ਕੀਮਤਾਂ ਵਿੱਚ ਵਾਧਾ ਹਾਲੇ ਤੱਕ ਸਵੀਕਾਰਨ ਯੋਗ ਪੱਧਰ ਤੱਕ ਨਹੀਂ ਆਇਆ, ਇਸ ਵਿੱਚ ਹੋਰ ਕਮੀ ਆਉਣੀ ਚਾਹੀਦੀ ਹੈ। ਮੁਖਰਜੀ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਮੇਰਾ ਮੰਨਣਾ ਹੈ ਕਿ ਮਹਿੰਗਾਈ ਵਿੱਚ ਹੋਰ ਕਮੀ ਆਉਣੀ ਚਾਹੀਦੀ ਹੈ। ਮੈਨੂੰ ਉਮੀਦ ਹੈ ਕਿ ਇਸ ਵਿੱਚ ਹੋਰ ਗਿਰਾਵਟ ਆਏਗੀ। ਅੱਜ ਜਾਰੀ ਅਧਿਕਾਰਤ ਅੰਕੜਿਆਂ ਅਨੁਸਾਰ ਜਨਵਰੀ ਵਿੱਚ ਖੁਰਾਕੀ ਵਸਤੂਆਂ ਵਿੱਚ ਸਿੱਕੇ ਦੇ ਪਾਸਾਰ ਦੀ ਦਰ 0 ਤੋਂ 52 ਪ੍ਰਤੀਸ਼ਤ ਹੇਠਾਂ ਰਹੀ। ਵਿਸ਼ਲੇਸ਼ਣ ਅਧੀਨ ਮਹੀਨੇ ਵਿੱਚ ਸਬਜੀਆਂ ਦੀਆਂ ਕੀਮਤਾਂ ਸਾਲਾਨਾ ਆਧਾਰ ਉੱਤੇ 43.13 ਪ੍ਰਤੀਸ਼ਤ ਘੱਟ ਹੋਈਆਂ ਹਨ। ਜਦੋਂ ਕਿ ਕਣਕ 3.48 ਫੀਸਦੀ ਸਸਤੀ ਹੋਈ ਹੈ। ਜਨਵਰੀ ਵਿੱਚ ਆਲੂ ਦੀਆਂ ਕੀਮਤਾਂ 23.15 ਪ੍ਰਤੀਸ਼ਤ ਅਤੇ ਪਿਆਜ ਦੀਆਂ ਕੀਮਤਾਂ 75.57 ਫੀਸਦੀ ਘੱਟ ਹੋਈਆਂ ਹਨ। ਥੋਕ ਮੁੱਲ ਸੂਚਕ ਅੰਕ ਵਿੱਚ ਖਾਧ ਵਸਤੂਆਂ ਦੀ ਹਿੱਸੇਦਾਰੀ 14.3 ਪ੍ਰਤੀਸ਼ਤ ਦੀ ਹੈ। ਪੈਦਾਵਾਰੀ ਉਤਪਾਦਾਂ ਵਿੱਚ ਸਿੱਕੇ ਦੇ ਪਾਸਾਰ ਦੀ ਦਰ ਜਨਵਰੀ ਵਿੱਚ 6.49 ਫੀਸਦੀ ਰਹੀ। ਇਸ ਨਾਲ ਪਿਛਲੇ ਮਹੀਨੇ ਇਹ 7.48 ਫੀਸਦੀ ਦੇ ਪੱਧਰ ਉੱਪਰ ਸੀ। ਪੈਦਾਵਾਰੀ ਉਤਪਾਦਾਂ ਦੀ ਮਹਿੰਗਾਈ 2011 ਵਿੱਚ ਕਾਫੀ ਉੱਚੇ ਪੱਧਰ ’ਤੇ ਬਣੀ ਹੋਈ ਸੀ। ਇਸ ਸਮੇਂ ਇਹ 6 ਪ੍ਰਤੀਸ਼ਤ ਨੂੰ ਪਾਰ ਕਰ ਗਈ ਸੀ। ਪੈਦਾਵਾਰੀ ਵਸਤੂਆਂ ਵਿੱਚ ਲੋਹਾ ਅਤੇ ਉਸ ਤੋਂ ਬਣੇ ਉਤਪਾਦ ਸਾਲਾਨਾ ਆਧਾਰ ਉੱਤੇ 18.46 ਪ੍ਰਤੀਸ਼ਤ ਮਹਿੰਗੇ ਹੋਏ। ਇਸ ਦੌਰਾਨ ਖੁਰਾਕੀ ਤੇਲਾਂ ਦੀਆਂ ਕੀਮਤਾਂ 9.59 ਪ੍ਰਤੀਸ਼ਤ ਵਧੀਆ। ਇਵੇਂ ਤੰਬਾਕੂ ਉਤਪਾਦਾਂ ਦੀਆਂ ਕੀਮਤਾਂ ਵਿੱਚ 9.36 ਪ੍ਰਤੀਸ਼ਤ ਅਤੇ ਮੂਲ ਧਾਤੂ ਦੀਆਂ ਕੀਮਤਾਂ ਵਿੱਚ 11.99 ਪ੍ਰਤੀਸ਼ਤ ਵਾਧਾ ਹੋਇਆ।
ਜਨਵਰੀ ਵਿੱਚ ਸਾਰੀਆਂ ਪ੍ਰਮੁੱਖ ਵਸਤਾਂ ਦੀ ਮਹਿੰਗਾਈ 2.25 ਫੀਸਦੀ ਰਹੀ। ਜੋ ਪਿਛਲੇ ਸਾਲ ਦਸੰਬਰ ਵਿੱਚ 3.07 ਫੀਸਦੀ ਸੀ। ਗੈਰ ਖੁਰਾਕੀ ਪ੍ਰਮੁੱਖ ਵਸਤੂਆਂ ਦੀ ਮਹਿੰਗਾਈ ਵੀ ਜਨਵਰੀ ਵਿੱਚ ਘੱਟ ਕੇ 0.55 ਪ੍ਰਤੀਸ਼ਤ ਰਹਿ ਗਈ। ਜਿਹੜੀ ਇਸ ਤੋਂ ਪਿਛਲੇ ਮਹੀਨੇ 1.48 ਫੀਸਦੀ ਸੀ। ਇੱਧਰ ਬਾਲਣ ਅਤੇ ਬਿਜਲੀ ਵਰਗ ਦੀ ਮਹਿੰਗਾਈ ਜਨਵਰੀ ਵਿੱਚ ਸਾਲਾਨਾ ਆਧਾਰ ਉੱਤੇ 14.21 ਫੀਸਦੀ ਰਹੀ। ਜਿਹੜੀ ਦਸੰਬਰ ਵਿੱਚ 14.91 ਫੀਸਦੀ ਸੀ। ਇਸ ਵਿਚਕਾਰ ਨਵੰਬਰ 2011 ਦੇ ਮੁਦਰਾ ਪਸਾਰ ਨੂੰ ਉੱਪਰ ਵੱਲ ਸੋਧ ਕਰਕੇ 9.46 ਫੀਸਦੀ ਕਰ ਦਿੱਤਾ ਗਿਆ ਹੈ। ਇਸ ਦਾ ਸ਼ੁਰੂਆਤੀ ਅਨੁਮਾਨ 9.11 ਫੀਸਦੀ ਦਾ ਸੀ। ਮਾਹਿਰਾਂ ਦਾ ਆਖਣਾ ਹੈ ਕਿ ਮਹਿੰਗਾਈ ਦੀ ਦਰ ਵਿੱਚ ਕਮੀ ਤੋਂ ਬਾਅਦ ਰਿਜ਼ਰਵ ਬੈਂਕ ਕੋਲ ਆਉਣ ਵਾਲੇ ਮਹੀਨੇ ਵਿੱਚ ਵਿਆਜ ਦਰਾਂ ਵਿੱਚ ਕਟੌਤੀ ਦਾ ਮੌਕਾ ਹੋਵੇਗਾ। 2010-2011 ਵਿੱਚ ਜ਼ਿਆਦਾਤਰ ਸਮੇਂ ਤੱਕ  ਸਿੱਕੇ ਦੇ ਪਾਸਾਰ ਦੀ ਕੁੱਲ ਦਰ 10 ਪ੍ਰਤੀਸ਼ਤ ਦੇ ਆਸ-ਪਾਸ ਦੇ ਬਣੀ ਰਹੇਗੀ।

Share this post