ਬਟਾਲਾ (ਸ਼ਰਨਜੀਤ ਸਿੰਘ)- ਸੋਨੇ ਦੇ ਅਸਮਾਨ ਛੂੰਹਦੇ ਦਿਨ-ਬ-ਦਿਨ ਵਧ ਰਹੇ ਰੇਟ ਕਾਰਨ ਜਿਥੇ ਸੋਨੇ ਦੇ ਗਹਿਣਿਆਂ ਦਾ ਕਾਰੋਬਾਰ ਕਰਨ ਵਾਲੇ ਸਵਰਨਕਾਰਾਂ ਦੇ ਕਾਰੋਬਾਰ ਨੂੰ ਵਿਆਪਕ ਪੱਧਰ ’ਤੇ ਮੰਦੀ ਦਾ  ਸਾਹਮਣਾ ਕਰਨਾ ਪੈ ਰਿਹਾ ਹੈ ਉਥੋਂ ਇਮੀਟੇਸ਼ਨ ਜਿਊਲਰੀ (ਸੋਨੇ ਵਰਗੇ ਨਕਲੀ ਗਹਿਣੇ) ਦੇ ਦੁਕਾਨਦਾਰਾਂ ਦਾ ਕਾਰੋਬਾਰ ਬੁਲੰਦੀਆਂ ਛੂਹ ਰਿਹਾ। ਇਸ ਸਬੰਧੀ ਕੀਤੇ ਬਟਾਲਾ ਸ਼ਹਿਰ ਦੇ ਸਰਵੇਖਣ ਦੌਰਾਨ ਉਪਰੋਕਤ ਤੱਥ ਸਾਹਮਣੇ ਆਏ ਹਨ। ਜ਼ਿਲ੍ਹਾ ਸਵਰਨਕਾਰ ਸੰਘ ਦੇ ਪ੍ਰਧਾਨ ਅਸ਼ੋਕ ਲੂਥਰਾ, ਜਨਰਲ ਸਕੱਤਰ ਯਸ਼ਪਾਲ ਚੌਹਾਨ ਅਨੁਸਾਰ ਬੀਤੇ ਦੋ ਸਾਲਾਂ ਦੌਰਾਨ ਸੋਨੇ ਦੇ ਰੇਟ ਡਿਉਡੇ ਵਧ ਜਾਣ ਕਾਰਨ ਹੁਣ ਆਮ ਲੋਕ ਤਾਂ ਸੋਨੇ ਦੇ ਗਹਿਣੇ ਬਣਾਉਣ ਪਾਉਣ ਦਾ ਸੁਪਨਾ ਮਾਤਰ ਹੀ ਲੈ ਸਕਦੇ ਹਨ ਜਦੋਂ ਕਿ ਅਮੀਰ ਲੋਕਾਂ ਵਿੱਚ ਵੀ ਸੋਨੇ ਦੇ ਗਹਿਣੇ ਬਣਾਉਣ ਖਰੀਦਣ ਦੇ ਰੁਝਾਨ ਵਿੱਚ ਕਾਫੀ ਗਿਰਾਵਟ ਆ ਗਈ ਹੈ, ਜਿਸਦੇ ਤਹਿਤ ਵਿਆਹ ਸ਼ਾਦੀਆਂ ਮੌਕੇ 20-30-50 ਤੋਲੇ ਤਕ ਦੇ ਸੋਨੇ ਦੇ ਗਹਿਣੇ ਬਣਵਾਉਣ ਖਰੀਦਣ ਵਾਲੇ ਸੰਪੰਨ ਪਰਿਵਾਰ ਵੀ ਹੁਣ 5-10 ਤੋਲੇ ਤੱਕ ਹੀ ਸੋਨੇ ਦੇ ਗਹਿਣੇ ਖਰੀਦ ਜਾ ਬਣਵਾ ਰਹੇ ਹਨ ਜਦੋਂ ਕਿ ਹੁਣ ਤਾਂ ਖਾਂਦੇ ਪੀਂਦੇ ਸਮਾਗਮਾਂ ਤੇ ਸੋਨੇ ਦਾ ਪਾਣੀ ਚੜ੍ਹੇ ‘ਨਕਲੀ’ ਕਹੇ ਜਾਂਦੇ ਗਹਿਣੇ ਪਾ ਕੇ ਹੀ ਬੁੱਤਾ ਸਾਰ ਲੈਂਦੀਆਂ ਹਨ ਜਿਸ ਕਾਰਨ ਸੋਨੇ ਦੇ ਗਹਿਣਿਆਂ ਦੇ ਕਾਰੋਬਾਰ ’ਚ ਲੱਗੇ

ਲੋਕ (ਸੁਨਿਆਰੇ) ਆਰਥਿਕ ਮੰਦਵਾੜੇ ਦਾ ਸ਼ਿਕਾਰ ਹੋ ਰਹੇ ਹਨ। ਦੂਜੇ ਪਾਸੇ ਸੋਨੇ ਦੇ ਅਸਮਾਨੀ ਚੜਦੇ ਜਾ ਰਹੇ ਰੇਟਾਂ ਕਾਰਨ ਸੋਨੇ ਦਾ ਪਾਣੀ ਚੜੇ ਨਕਲੀ ਕਿਸਮ ਦੇ ਗਹਿਣਿਆਂ ਦੀਆਂ ਬਟਾਲਾ ਵਿੱਚ ਅੱਜ ਤੋਂ ਪੰਜ ਕੁ ਸਾਲ ਪਹਿਲਾਂ ਸਿਰਫ 4 ਦੁਕਾਨਾਂ ਸਨ ਜਦੋਂ ਕਿ ਸੋਨਾ ਮਹਿੰਗਾ ਹੋ ਜਾਣ ਕਾਰਨ ਹੁਣ ਬਟਾਲਾ ਵਿੱਚ ਸੋਨੇ ਦਾ ਪਾਣੀ ਚੜੇ ਗਹਿਣੇ ਵੇਚਣ ਦੀਆਂ 30 ਦੇ ਕਰੀਬ ਹੋਰ ਦੁਕਾਨਾਂ ਖੁਲ੍ਹਣ ਤੋਂ ਇਲਾਵਾ ਅਜਿਹੇ ਸੋਨੇ ਦਾ ਪਾਣੀ ਚੜੇ ਗਹਿਣੇ ਵੇਚਣ ਦੇ 5 ਵੱਡੇ ਸ਼ੋਅ ਰੂਮ ਵੀ ਖੁੱਲ ਗਏ ਹਨ।

Share this post