ਮੁੰਬਈ, 28 ਜੂਨ (ਵਿਸ਼ਵ ਵਾਰਤਾ)-ਅਭਿਨੇਤਰੀ ਐਸ਼ਵਰਿਆ ਰਾਏ ਦੇ ਮਾਂ ਬਣਨ ਦੀਆਂ ਖ਼ਬਰਾਂ ਤੋਂ ਬਾਅਦ ਬੱਚਨ ਪਰਿਵਾਰ ਵਿਚ ਨੰਨ੍ਹੇ ਮਹਿਮਾਨ ਦੀਆਂ ਹੀ ਗੱਲਾਂ ਚਲਦੀਆਂ ਰਹਿੰਦੀਆਂ ਹਨ। ਬੱਚਨ ਪਰਿਵਾਰ ਵਿਚ ਖੁਸ਼ੀ ਦਾ ਮਾਹੌਲ ਹੈ ਅਤੇ ਉਨ੍ਹਾਂ ਨੂੰ ਲੋਕਾਂ ਵੱਲੋਂ ਹੁਣ ਤੋਂ ਹੀ ਵਧਾਈਆਂ ਦਾ ਤਾਂਤਾ ਲੱਗਣਾ ਸ਼ੁਰੂ ਹੋ ਗਿਆ ਹੈ, ਜਦੋਂਕਿ ਐਸ਼ਵਰਿਆ ਨਵੰਬਰ ਮਹੀਨੇ ’ਚ ਮਾਂ ਬਣੇਗੀ। ਦੂਸਰੇ ਪਾਸੇ ਅਭਿਸ਼ੇਕ ਬੱਚਨ ਦਾ ਕਹਿਣਾ ਹੈ ਕਿ ਉਹ ਚਾਹੁੰਦੇ ਹਨ ਕਿ ਉਨ੍ਹਾਂ ਦੇ ਘਰ ਦੋ ਬੱਚੇ ਹੀ ਪੈਦਾ ਹੋਣ ਤੇ ਉਨ੍ਹਾਂ ਦਾ ਪਹਿਲਾ ਬੱਚਾ ਲੜਕੀ ਹੋਵੇ। ਅਭਿਸ਼ੇਕ ਚਾਹੁੰਦੇ ਹਨ ਕਿ ਉਨ੍ਹਾਂ ਦੀ ਬੇਟੀ ਉਨ੍ਹਾਂ ਦੀ ਪਤਨੀ ਦੀ ਤਰ੍ਹਾਂ ਹੀ ਖੂਬਸੂਰਤ ਹੋਵੇ। ਅਭਿਸ਼ੇਕ ਮੁਤਾਬਿਕ ਉਸ ਦੇ ਘਰ ਵਿਚ ਆਉਣ ਵਾਲੇ ਬੱਚੇ ਦੇ ਨਾਮ ’ਤੇ ਚਰਚਾ ਹੁੰਦੀ ਰਹਿੰਦੀ ਹੈ, ਇਥੋਂ ਤੱਕ ਕਿ ਹਰ ਸਮੇਂ ਉਨ੍ਹਾਂ ਦੇ ਬੱਚੇ ਦੀਆਂ ਹੀ ਗੱਲਾਂ ਚਲਦੀਆਂ ਰਹਿੰਦੀਆਂ ਹਨ।

ਪਿਛਲੇ ਦਿਨੀਂ ਅਭਿਸ਼ੇਕ ਦੇ ਪਿਤਾ ਅਮਿਤਾਬ ਬੱਚਨ ਨੇ ਖੁਦ ਇਹ ਖ਼ਬਰ ਦਿੱਤੀ ਸੀ ਕਿ ਉਹ ਛੇਤੀ ਹੀ ਦਾਦਾ ਬਣਨ ਵਾਲੇ ਹਨ। ਇਸ ਦੌਰਾਨ ਐਸ਼ਵਰਿਆ ਆਪਣੀ ਨਵੀਂ ਫਿਲਮ ‘ਹੀਰੋਈਨ’ ਵਿਚ ਰੁੱਝੀ ਹੋਈ ਹੈ। ਇਸ ਫਿਲਮ ਦੇ ਨਿਰਮਾਤਾ ਮਧੁਰ ਭੰਡਾਰਕਰ ਐਸ਼ਵਰਿਆ ਦੇ ਮਾਂ ਬਣਨ ਨੂੰ ਲੈ ਕੇ ਪ੍ਰੇਸ਼ਾਨ ਹਨ, ਕਿਉਂਕਿ ਫਿਲਮ ਦੀ ਸ਼ੂਟਿੰਗ ਅੱਧ ਵਿਚਾਲੇ ਹੈ ਅਤੇ ਉਹ ਇਹ ਨਹੀਂ ਚਾਹੁੰਦੇ ਕਿ ਇਸ ਦੌਰਾਨ ਐਸ਼ਵਰਿਆ ਨੂੰ ਕਿਸੇ ਤਰ੍ਹਾਂ ਦੀ ਕੋਈ ਪ੍ਰੇਸ਼ਾਨੀ ਹੋਵੇ। ਜਦੋਂ ਕਿ ਐਸ਼ਵਰਿਆ ਦਾ ਕਹਿਣਾ ਹੈ ਕਿ ਉਹ ਜੁਲਾਈ ਤੱਕ ਸ਼ੂਟਿੰਗ ਦੀਆਂ ਸਾਰੀਆਂ ਤਰੀਕਾਂ ਦੇ ਕੇ ਫਿਲਮ ਪੂਰੀ ਕਰ ਲਵੇਗੀ।

Share this post