ਹੁਸ਼ਿਆਰਪੁਰ,  (ਐਮ.ਐਸ.ਹੀਰਾ)-ਓਵਰਸੀਜ਼ ਕਾਂਗਰਸ  ਦੇ ਪ੍ਰਧਾਨ ਤੇ ਪੰਜਾਬ ਦੇ ਪ੍ਰਵਾਸੀ ਭਾਰਤੀ ਸੈੱਲ ਦੇ ਚੇਅਰਮੈਨ ਦਲਜੀਤ ਸਿੰਘ ਸਹੋਤਾ ਤੇ ਇਨ੍ਹਾਂ ਦੇ ਸਾਥੀਆਂ ਨੇ ਪਿਛਲੇ ਢਾਈ ਮਹੀਨੇ ਤੋਂ ਪੰਜਾਬ ’ਚ ਡੇਰੇ ਲਗਾਏ ਹੋਏ ਹਨ। ਚੋਣਾਂ ਦੌਰਾਨ ਓਵਰਸੀਜ਼ ਕਾਂਗਰਸ ਵਿਸ਼ੇਸ਼ ਕਰਕੇ ਦੋਆਬੇ ’ਚ ਬਹੁਤ ਸਰਗਰਮ ਰਹੀ ਤੇ ਕਾਂਗਰਸੀ ਉਮੀਦਵਾਰਾਂ ਦੇ ਹੱਕ ’ਚ ਪੂਰੀ ਸ਼ਿੱਦਤ ਨਾਲ ਡੱਟ ਕੇ ਪ੍ਰਚਾਰ ਕੀਤਾ। ਓਵਰਸੀਜ਼ ਕਾਂਗਰਸ ਦੀ ਹੁਸ਼ਿਆਰਪੁਰ, ਚੱਬੇਵਾਲ, ਗੜ੍ਹਸ਼ੰਕਰ, ਸ਼ਾਮਚੁਰਾਸੀ, ਉੜਮੁੜ, ਦਸੂਹਾ ਸਮੇਤ ਬੰਗਾ, ਨਵਾਂਸ਼ਹਿਰ ਤੇ ਫਗਵਾੜਾ ਦੇ ਚੋਣ ਹਲਕਿਆਂ ’ਚ ਮੌਜੂਦਗੀ ਮਹਿਸੂਸ ਹੋਈ। ਦਲਜੀਤ ਸਿੰਘ ਸਹੋਤਾ ਨੇ ਕਿਹਾ ਕਿ ਇਨ੍ਹਾਂ 9 ਸੀਟਾਂ ਵਿਚੋਂ 5-6 ਸੀਟਾਂ ਕਾਂਗਰਸ ਜ਼ਰੂਰ ਜਿੱਤੇਗੀ ਅਤੇ ਇਨ੍ਹਾਂ ਜਿੱਤਾਂ ਵਿਚ ਓਵਰਸੀਜ਼ ਕਾਂਗਰਸ ਦਾ ਵੱਡਾ ਯੋਗਦਾਨ ਹੈ।  ਅੱਜ ਇਕ ਵਿਸ਼ੇਸ਼  ਭੇਟ ਵਾਰਤਾ ਦੌਰਾਨ ਦਲਜੀਤ ਸਿੰਘ ਸਹੋਤਾ ਨੇ ਇੰਕਸ਼ਾਫ ਕੀਤਾ ਕਿ ਪੰਜਾਬ  ਦੀਆਂ ਚੋਣਾਂ ਦੇ ਸੰਬੰਧ ਵਿਚ, ਇਹ ਉਨ੍ਹਾਂ ਦਾ ਚੌਥਾ ਚੱਕਰ ਹੈ ਅਤੇ ਹੁਣ ਉਹ 6 ਮਾਰਚ ਨੂੰ ਵੋਟਾਂ ਦੀ ਗਿਣਤੀ ਉਪਰੰਤ ਹੀ ਮਹਾਰਾਜਾ ਅਮਰਿੰਦਰ ਸਿੰਘ ਦੀ ਸਰਕਾਰ ਨੂੰ ਸਹੁੰ ਚੁਕਾਉਣ ਉਪਰੰਤ ਹੀ ਇੰਗਲੈਂਡ ਵਾਪਸ ਜਾਣਗੇ।  ਦਲਜੀਤ ਸਿੰਘ ਸਹੋਤਾ ਨੇ ਇੰਕਸ਼ਾਫ ਕੀਤਾ ਕਿ ਇੰਗਲੈਂਡ ਕੈਨੇਡਾ, ਅਮਰੀਕਾ ਅਤੇ ਯੂਰਪੀ ਦੇਸ਼ਾਂ ’ਚ ਵਸੇ ਪ੍ਰਵਾਸੀ ਪੰਜਾਬੀਆਂ ਨੂੰ ਇਹ

ਜਾਣ ਕੇ ਦੁੱਖ ਮਹਿਸੂਸ ਹੁੰਦਾ ਹੈ ਕਿ ਪੰਜਾਬ ੇ ਉਦਯੋਗਿਕ ਵਿਕਾਸ ਤੇ ਪੂੰਜੀ ਨਿਵੇਸ਼ ਵਿਚ ਪੱਛੜ ਕੇ 15ਵੇਂ ਸਥਾਨ ’ਤੇ ਪੁੱਜ ਗਿਆ ਹੈ। ਉਨ੍ਹਾਂ ਉਮੀਦ ਪ੍ਰਗਟ ਕੀਤੀ ਕਿ ਕੈਪ. ਅਮਰਿੰਦਰ ਸਿੰਘ ਇਕ ਦੂਰ-ਅੰਦੇਸ਼ੀ ਅਤੇ ਅਗਾਂਹਵਧੂ ਸ਼ਖਸ਼ੀਅਤ ਵਾਲੇ ਸਿਆਸਤਦਾਨ ਹਨ। ਉਹ ਜ਼ਰੂਰ ਪੰਜਾਬ ’ਚ ਸਹਾਇਕ ਅਤੇ ਉਪਯੋਗੀ ਪੂੰਜੀ ਨਿਵੇਸ਼ ਕਰਨ ਦਾ ਮਾਹੌਲ ਕਾਇਮ ਕਰਨਗੇ। ਸਹੋਤਾ ਨੇ ਇੰਕਸ਼ਾਫ ਕੀਤਾ ਕਿ ਪ੍ਰਵਾਸੀ ਪੰਜਾਬ ਉਚੇਚੇ ਤੌਰ ’ਤੇ ਸਨੀਅਤੀ ਵਸਤਾਂ ਅਤੇ ਪ੍ਰਾਪਰਟੀ ਅਤੇ ਆਮ ਰੂਪ ’ਚ ਬਿਜਲੀਕਰਨ ਵਿਚ ਪੂੰਜੀ ਨਿਵੇਸ਼ ਕਰਨ ਦੀ ਇੱਛਾ ਰੱਖਦੇ ਹਨ। ਉਨ੍ਹਾਂ ਨੂੰ ਪੂਰੀ ਉਮੀਦ ਹੈ ਕਿ ਕੈਪਟਨ ਦੀ ਅਗਵਾਈ ਵਾਲੀ ਸਰਕਾਰ ਪ੍ਰਵਾਸੀ ਪੰਜਾਬੀਆਂ ਨੂੰ ਪੰਜਾਬ ’ਚ ਨਿਵੇਸ਼ ਕਰਨ ਦੀਆਂ ਸਹੂਲਤਾਂ ਦੇਣਗੇ, ਉਥੇ ਉਹ ਪ੍ਰਵਾਸੀਆਂ ਦੀਆਂ ਜਾਇਦਾਦਾਂ ਅਤੇ ਉਨ੍ਹਾਂ ਦੇ ਸਕੇ-ਸੰਬੰਧੀਆਂ ਦੀ ਰੱਖਿਆ ਲਈ ਵੀ ਯੋਗ ਕਾਨੂੰਨ ਬਨਾਉਣਗੇ।

Share this post