ਤਹਿਰਾਨ (ਅ.ਬ.)-ਦੁਨੀਆ ਦੇ ਕੁਝ ਦੇਸ਼ਾਂ ਵਿਚ ਅੱਤਵਾਦੀ ਘਟਨਾਵਾਂ ਦੀਆਂ ਸਾਜ਼ਿਸ਼ਾਂ ਰਚਣ ਦੇ ਦੋਸ਼ਾਂ ਵਿਚ ਘਿਰੇ ਇਰਾਨ ਨੇ ਆਪਣੀ ਪਰਮਾਣੂ ਤਾਕਤ ਦੀ ਨੁਮਾਇਸ਼ ਕਰਦਿਆਂ ਅਮਰੀਕਾ ਅਤੇ ਹੋਰ ਪੱਛਮੀ ਦੇਸ਼ਾਂ ਨੂੰ ‘ਹੰਕਾਰੀ ਤਾਕਤਾਂ’ ਕਰਾਰ ਦਿੰਦਿਆਂ ਉਨ੍ਹਾਂ ਨੂੰ ਸਬਕ ਸਿਖਾਉਣ ਦੀ  ਤਾੜਨਾ ਕੀਤੀ ਹੈ। ਅਜਿਹਾ ਕਰਦਿਆਂ ਕਰਦਿਆਂ ਇਰਾਨ ਨੇ ਯੂਰਪੀ ਯਨੀਅਨ ਦੇ 6 ਦੇਸ਼ਾਂ ਨੂੰ ਤੇਲ ਦੀ ਸਪਲਾਈ ਰੋਕ ਦੇਣ ਦਾ ਵੀ ਐਲਾਨ

ਕੀਤਾ ਹੈ। ਇਰਾਨ ਦੇ ਰਾਸ਼ਟਰਪਤੀ ਮਹਿਮੂਦ ਅਹਿਮਦੀਨੇਜਾਦ ਨੇ ਅੱਜ ਰਾਸ਼ਟਰ ਦੇ ਨਾਂ ਸੰਬੋਧਨ ਦੌਰਾਨ ਕਿਹਾ ਕਿ ਸਾਨੂੰ ਅਮਰੀਕਾ ਅਤੇ ਹੋਰ ਪੱਛਮੀ ਦੇਸ਼ਾਂ ਦੀਆਂ  ਹੰਕਾਰੀ ਤਾਕਤਾਂ ਨੂੰ ਸਬਕ ਸਿਖਾਉਣਾ ਹੀ ਪਵੇਗਾ। ਇਰਾਨ ਵਿਚ ਹੀ ਬਣੇ ਪਰਮਾਣੂ ਤੇਲ ਰਾਡਾਰ ਨੂੰ ਇਕ ਖੋਜੀ ਰਿਐਕਟਰ ਵਿਚ ਲੋਡ ਕੀਤਾ ਗਿਆ। ਸਥਾਨਕ ਮੀਡੀਆ ਵਲੋਂ ਇਸ ਨੂੰ ਇਰਾਨ ਦੀ ਵੱਡੀ ਕਾਮਯਾਬੀ ਵਜੋਂ ਦੇਖਿਆ ਜਾ ਰਿਹਾ ਹੈ ਪਰੰਤੂ ਦੂਜੇ ਪਾਸੇ ਅਮਰੀਕਾ ਸਮੇਤ ਪੱਛਮੀ ਦੇਸ਼ਾਂ ਵਿਚ ਇਸ ਨੂੰ ਲੈ ਕੇ ਤਣਾਅ ਵਾਲੇ ਹਾਲਾਤ ਪੈਦਾ ਹੋ ਰਹੇ ਹਨ। ਪਿਛਲੇ ਮਹੀਨੇ ਹੀ ਤਹਿਰਾਨ ਨੇ ਐਲਾਨ ਕੀਤਾ ਸੀ ਕਿ ਉਸ ਨੇ ਪਰਮਾਣੂ ਤੇਲ ਬਣਾਉਣ ਅਤੇ ਉਸ ਦਾ ਸਫਲ ਤਜਰਬਾ ਕਰਨ ਵਿਚ ਵੀ ਕਾਮਯਾਬੀ ਹਾਸਲ ਕਰ ਲਈ ਹੈ। ਹੁਣ ਇਰਾਨ ਦੇ ਆਜ਼ਾਦ ਰੂਪ ਵਿਚ ਪਰਮਾਣੂ ਤੇਲ ਵਿਕਸਤ ਕਰਨ ਤੋਂ ਬਾਅਦ ਇਹ ਸ਼ੱਕ ਵੱਧ ਗਿਆ ਹੈ ਕਿ ਇਰਾਨ ਬਿਨ੍ਹਾਂ ਵਿਦੇਸ਼ੀ ਸਹਾਇਤਾ ਦੇ ਕਿਤੇ ਹਥਿਆਰ ਵੀ ਹਾਸਲ ਨਾ ਕਰ ਲਵੇ। ਇਸ ਦੇ ਨਾਲ ਹੀ ਹੀ ਇਰਾਨ ਨੇ ਨੀਦਰਲੈਂਡ, ਸਪੇਨ, ਪੁਰਤਗਾਲ, ਫਰਾਂਸ, ਗਰੀਸ ਅਤੇ ਇਟਲੀ ਨੂੰ ਤੇਲ ਦੀ ਸਪਲਾਈ ਰੋਕਣ ਦਾ ਐਲਾਨ ਕੀਤਾ ਹੈ। ਦੂਜੇ ਪਾਸੇ ਇਜ਼ਰਾਇਲੀ ਪ੍ਰਧਾਨ ਮੰਤਰੀ ਨੇ ਕਿਹਾ ਹੈ ਕਿ ਭਾਰਤ ਅਤੇ ਜਾਰਜੀਆ ਦੇ ਇਜ਼ਰਾਇਲੀ ਹਾਈ ਕਮਿਸ਼ਨਾਂ ’ਤੇ ਹਮਲੇ ਨਾਲ ਇਰਾਨ ਦੀਆਂ ਅੱਤਵਾਦੀ ਹਰਕਤਾਂ ਜੱਗ ਜ਼ਾਹਰ ਹੋ ਗਈਆਂ ਹਨ। ਬੈਂਕਾਕ ਵਿਚ ਵੀ ਹੋਏ ਧਮਾਕਿਆਂ ਵਿਚ ਇਰਾਨ ਦਾ ਹੱਥ ਦੱਸਿਆ ਜਾ ਰਿਹਾ ਹੈ ਪਰ ਇਰਾਨ ਨੇ ਇਸ ਦਾ ਖੰਡਨ ਕੀਤਾ ਹੈ।

Share this post