ਪੰਜਾਬ ਵਿੱਚ ਨਸ਼ਿਆਂ ਦਾ ਪ੍ਰਭਾਵ ਖੇਤਰ ਲਗਾਤਾਰ ਵੱਧ ਰਿਹਾ ਹੈ, ਜਿਸ ਦਾ ਪਿੰਡਾਂ ਅਤੇ ਸ਼ਹਿਰਾਂ ਵਿੱਚ ਨੌਜਵਾਨ ਤਬਕਾ ਖਾਸ ਤੌਰ ਤੇ ਨਿਸ਼ਾਨਾ ਬਣ ਰਿਹਾ ਹੈ। ਰਵਾਇਤੀ ਨਸ਼ਿਆਂ ਦੀ ਥਾਂ ਹੁਣ ਪੰਜਾਬ ਵਿੱਚ ਬਹੁਤ ਮਾਰੂ ਜ਼ਹਿਰਾਂ ਵੀ ਨਸ਼ੇ ਵੱਜੋਂ ਵਰਤੀਆਂ ਜਾ ਰਹੀਆਂ ਹਨ। ਇਹ ਨਕਲੀ ਨਸ਼ੇ ਰਵਾਇਤੀ ਨਸ਼ੀਲੇ ਪਦਾਰਥਾਂ ਤੋਂ ਵੀ ਖਤਰਨਾਕ ਹਨ। ਪੰਜਾਬ ਵਿੱਚ ਅਫੀਮ ਅਤੇ ਸ਼ਰਾਬ ਦਾ ਚੱਲਨ ਪੁਰਾਣੇ ਸਮੇਂ ਤੋਂ ਹੈ, ਪ੍ਰੰਤੂ ਹੁਣ ਕੋਕੀਨ, ਹੈਰੋਇਨ ਅਤੇ ਸਮੈਕ ਵਰਗੇ ਮਹਿੰਗੇ ਨਸ਼ੇ ਵੀ ਆਮ ਹੋ ਗਏ ਹਨ। ਇਨ੍ਹਾਂ ਨਸ਼ਿਆਂ ਦੀ ਨਕਲ ਵੀ ਵੇਚੀ ਜਾ ਰਹੀ ਹੈ। ਪੁਲਿਸ ਅਧਿਕਾਰੀ ਵੀ ਇਹ ਮੰਨਦੇ ਹਨ ਕਿ ਪੰਜਾਬ ਵਿੱਚ ਸਿੰਥੈਟਿਕ ਜਾਂ ਨਕਲੀ ਨਸ਼ੇ ਵੀ ਭਾਰੀ ਮਾਤਰਾ ਵਿੱਚ ਖਪਤ ਹੋ ਰਹੇ ਹਨ। ਇਸ ਵਰੇ ਪਹਿਲੇ ਪੰਜ ਮਹੀਨਿਆਂ ਦੌਰਾਨ ਹੀ ਪੰਜਾਬ ਵਿਚੋਂ ਸਿੰਥੈਟਿਕ ਡਰੱਗ ਨਾਲ ਸਬੰਧਿਤ ਨਸ਼ੇ ਦੇ 71 ਲੱਖ ਦੇ ਕਰੀਬ ਕੈਪਸੂਲ ਤੇ ਗੋਲੀਆਂ, ਦੋ ਕੁਇੰਟਲ ਸਿੰਥੈਟਿਕ ਪਾਊਡਰ, 23 ਹਜ਼ਾਰ ਦੇ ਕਰੀਬ ਨਸ਼ੇ ਦੀਆਂ ਪੀਣ ਵਾਲੀਆਂ ਦਵਾਈਆਂ ਦੀਆਂ ਸ਼ੀਸ਼ੀਆਂ ਅਤੇ 9 ਹਜ਼ਾਰ ਦੇ ਕਰੀਬ ਨਸ਼ੇ ਦੇ ਟੀਕੇ ਬਰਾਮਦ ਕੀਤੇ ਹਨ। ਅੰਕੜੇ ਦੱਸਦੇ ਹਨ ਕਿ ਡਰੱਗ ਬੜੇ ਖਤਰਨਾਕ ਢੰਗ ਨਾਲ ਸਮੁੱਚੇ ਪੰਜਾਬ ਨੂੰ ਆਪਣੇ ਘੇਰੇ ਵਿਚ ਲੈ ਰਹੀ ਹੈ। ਇਕੱਲੇ ਐਂਟੀ ਨਾਰਕੋਟਿਕ ਟਾਸਕ ਫੋਰਸ ਵੱਲੋਂ ਇਸ ਵਰੇ ਪਹਿਲੇ ਪੰਜ ਮਹੀਨਿਆਂ ਦੌਰਾਨ ਹੀ ਵੱਡੇ ਪੱਧਰ ‘ਤੇ ਕਈ ਨਵੇਂ-ਨਿਵੇਕਲੇ ਨਸ਼ੇ ਬਰਾਮਦ ਕੀਤੇ ਹਨ। ਟਾਸਕ ਫੋਰਸ ਵੱਲੋਂ ਇਸ ਮਹੀਨੇ ਮਈ ਤੱਕ ਹੀ ਨਸ਼ੇ ਦੇ 70,92,764 ਕੈਪਸੂਲ ਤੇ ਗੋਲੀਆਂ ਬਰਾਮਦ ਕੀਤੀਆਂ ਹਨ। ਸਾਲ 2010 ਦੌਰਾਨ 1,23,87,588 ਅਤੇ ਪਿਛਲੇ ਵਰੇ 77,12,912 ਨਸ਼ੇ ਦੇ ਕੈਪਸੂਲ ਤੇ ਗੋਲੀਆਂ ਬਰਾਮਦ ਕੀਤੀਆਂ ਹਨ। ਇਸ ਵਰ੍ਹੇ ਪਹਿਲੇ ਪੰਜ ਮਹੀਨਿਆਂ ਦੌਰਾਨ 200 ਕਿਲੋ ਤੋਂ ਵੱਧ ਸਿੰਥੈਟਿਕ ਪਾਊਡਰ ਬਰਾਮਦ ਹੋਇਆ ਹੈ। ਟਾਸਕ ਫੋਰਸ ਵੱਲੋਂ ਇਸ ਵਰੇ ਮਈ ਤੱਕ ਨਸ਼ੇ ਦੀਆਂ ਪੀਣ ਵਾਲੀਆਂ ਦਵਾਈ ਦੀਆਂ 22,796 ਸ਼ੀਸ਼ੀਆਂ ਬਰਾਮਦ ਕੀਤੀਆਂ ਹਨ ਜਦਕਿ ਸਾਲ 2010 ਦੌਰਾਨ 36,626 ਅਤੇ ਪਿਛਲੇ ਵਰ 25,466 ਨਸ਼ੇ ਦੀ ਦਵਾਈ ਦੀਆਂ ਬੋਤਲਾਂ ਬਰਾਮਦ ਕੀਤੀਆਂ ਸਨ। ਇਸ ਵਰੇ ਮਈ ਤੱਕ ਨਸ਼ੇ ਦੇ 8915 ਟੀਕੇ ਬਰਾਮਦ ਕੀਤੇ ਹਨ। ਸਾਲ 2010 ਦੌਰਾਨ 43,244 ਅਤੇ 29,229 ਨਸ਼ੇ ਦੇ ਟੀਕੇ ਫੜੇ ਗਏ ਸਨ।ਇਸ ਤਰ੍ਹਾਂ ਦੇ ਨਸ਼ੇ ਦਵਾਈਆਂ ਦੀਆਂ ਦੁਕਾਨਾਂ ਉੱਤੇ ਖੁੱਲ੍ਹੇ ਰੂਪ ਵਿੱਚ ਵੇਚੇ ਜਾ ਰਹੇ ਹਨ। ਪੰਜਾਬ ਵਿਚ ਮਹਿੰਗੀ ਅਤੇ ਆਧੁਨਿਕ ਡਰੱਗ ਸਮੈਕ, ਹੈਰੋਇਨ, ਸਮੈਕ ਅਤੇ ਚਰਸ ਵੀ ਵੱਡੀ ਮਾਤਰਾ ਵਿਚ ਖਪਤ ਹੋ ਰਹੀ ਹੈ। ਟਾਸਕ ਫੋਰਸ ਨੇ ਇਸ ਵਰੇ ਦੇ ਪਹਿਲੇ ਪੰਜ ਮਹੀਨਿਆਂ ਦੌਰਾਨ 16 ਕਿਲੋ ਦੇ ਕਰੀਬ ਸਮੈਕ ਬਰਾਮਦ ਕੀਤੀ ਹੈ। ਸਾਲ 2010 ਦੌਰਾਨ 48 ਕਿਲੋ ਅਤੇ ਪਿਛਲੇ ਵਰੇ 29 ਕਿਲੋ ਸਮੈਕ ਫੜੀ ਸੀ। ਇਸ ਵਰੇ ਮਈ ਤੱਕ 94 ਕਿਲੋ ਦੇ ਕਰੀਬ ਹੈਰੋਇਨ ਬਰਾਮਦ ਕੀਤੀ ਹੈ ਜਦਕਿ ਪਿਛਲੇ ਪੂਰੇ ਵਰੇ ਦੌਰਾਨ 29 ਕਿਲੋ ਹੈਰੋਇਨ ਬਰਾਮਦ ਕੀਤੀ ਸੀ। ਸਾਲ 2010 ਦੌਰਾਨ 190 ਕਿਲੋ ਹੈਰੋਇਨ ਬਰਾਮਦ ਕੀਤੀ ਸੀ। ਇਸ ਵਰੇ ਪਹਿਲੇ ਪੰਜ ਮਹੀਨਿਆਂ ਦੌਰਾਨ 47 ਕਿਲੋ ਤੋਂ ਵੱਧ ਚਰਸ ਬਰਾਮਦ ਕੀਤੀ ਗਈ ਸੀ। ਸਾਲ 2010 ਦੌਰਾਨ 128 ਕਿਲੋ ਅਤੇ ਪਿਛਲੇ ਵਰੇ 371 ਕਿਲੋ ਚਰਸ ਬਰਾਮਦ ਕੀਤੀ ਸੀ। ਕਹਿਣ ਦਾ ਭਾਵ ਇਹ ਹੈ ਕਿ ਭਾਰੀ ਮਾਤਰਾ ਵਿੱਚ ਮਾਰੂ ਨਸ਼ਿਆਂ ਦੀ ਮੌਜੂਦਗੀ ਪੰਜਾਬ ਦੇ ਭਵਿੱਖ ਲਈ ਬਹੁਤ ਹੀ ਚਿੰਤਾਜਨਕ ਸਥਿਤੀ ਪੈਦਾ ਕਰ ਰਹੀ ਹੈ। ਨਸ਼ਿਆਂ ਦੀ ਰੋਕਥਾਮ ਅਤੇ ਵਿਕਰੀ ਨੂੰ ਰੋਕਣ ਲਈ ਵਿਆਪਕ ਯੋਜਨਾਬੰਦੀ ਦੀ ਜਰੂਰਤ ਹੈ। ਇਸ ਮਾਮਲੇ ਵਿੱਚ ਸਰਕਾਰ ਅਤੇ ਪੁਲਿਸ ਦੇ ਨਾਲ-ਨਾਲ ਆਮ ਲੋਕਾਂ ਨੂੰ ਵੀ ਸ਼ਮੂਲੀਅਤ ਕਰਨੀ ਹੋਵੇਗੀ। ਪੰਜਾਬ ਦੀ ਜਵਾਨੀ ਨੂੰ ਬਚਾਉਣ ਲਈ ਨਸ਼ਿਆਂ ਨੂੰ ਪੂਰੀ ਤਰ੍ਹਾਂ ਰੋਕਣਾ ਸਮੇਂ ਦੀ ਸਭ ਤੋਂ ਵੱਡੀ ਜ਼ਰੂਰਤ ਹੈ।
-ਬਲਜੀਤ ਸਿੰਘ ਬਰਾੜ
