ਇਸ ਸਾਲ ਲੰਦਨ ਵਿੱਚ ਹੋਣ ਵਾਲਿਆਂ ਉਲੰਪਿਕ ਖੇਡਾਂ ਲਈ ਭਾਰਤੀ ਹਾਕੀ ਟੀਮ ਦਾ ਸਫਰ ਨਵੀਂ ਦਿੱਲੀ ਤੋਂ ਸ਼ੁਰੂ ਹੋ ਚੁੱਕਾ ਹੈ । 26 ਫਰਵਰੀ ਤਕ ਦਿੱਲੀ ਦੇ ਮੇਜਰ ਧਿਆਨ ਚੰਦ ਨੈਸ਼ਨਲ ਸਟੇਡੀਅਮ ਵਿੱਚ ਹੋਣ ਵਾਲੇ ਓਲੰਪਿਕ ਕੁਆਲੀਫਾਇੰਗ ਹਾਕੀ ਟੂਰਨਾਮੈਂਟ ਦੌਰਾਨ ਤਜਰਬੇਕਾਰ ਗੋਲਕੀਪਰ ਭਰਤ ਛੇਤਰੀ ਦੀ ਕਪਤਾਨੀ ਹੇਠ, ਭਾਰਤ ਦੇ ਖਿਡਾਰੀ ਰਾਸ਼ਟਰੀ ਟੀਮ ਦੀ ਉਲੰਪਿਕ ਨੂੰ ਜਾਣ ਵਾਲੀ ਡਾਵਾਂਡੋਲ ਕਿਸ਼ਤੀ ਨੂੰ ਸੰਭਾਲਣ ਦੀ ਤਿਆਰੀ ਕਰ ਰਹੇ ਹਨ । ਹਮੇਸ਼ਾ ਦੀ ਤਰਾਂ ਰਾਸ਼ਟਰੀ ਹਾਕੀ ਟੀਮ ਵਿੱਚ ਚੋਣਕਰਤਾਵਾਂ ਨੇ ਬਦਲਾਓ ਅਤੇ ਫੇਰਬਦਲ ਕਰਨ ਦੀ ਆਪਣੀ ਪੁਰਾਣੀ ਆਦਤ ਨੂੰ ਬਦਸਤੂਰ ਕਾਇਮ ਰੱਖਿਆ ਹੈ । ਇਸ ਟੂਰਨਾਮੈਂਟ ਲਈ 18 ਮੈਂਬਰੀ ਭਾਰਤੀ ਟੀਮ ਦਾ ਉਪ ਕਪਤਾਨ ਪਿਛਲੇ ਦਿਨੀਂ ਵਿਵਾਦਾਂ ਵਿੱਚ ਰਹੇ ਮਿਡਫੀਲਡਰ ਸਰਦਾਰ ਸਿੰਘ ਨੂੰ ਬਣਾਇਆ ਹੈ । ਪਿਛਲੇ ਕਈ ਟੂਰਨਾਮੈਂਟਾਂ ਵਿੱਚ ਉੱਪਰ-ਥੱਲੇ ਵਰਗਾ ਪ੍ਰਦਰਸ਼ਨ ਕਰਨ ਕਰਕੇ ਭਾਰਤੀ ਟੀਮ ਲਈ ਹਲਾਤ ਕੁਝ ਇਸ ਤਰਾਂ ਦੇ ਬਣ ਗਏ ਹਨ ਕਿ ਭਾਰਤ ਨੂੰ ਲੰਡਨ ਓਲੰਪਿਕ ਵਿੱਚ ਹਿੱਸਾ ਲੈਣ ਲਈ ਇਸ ਟੂਰਨਾਮੈਂਟ ਵਿੱਚ ਹਰ ਹਾਲਤ ਜਿੱਤ ਦਰਜ ਕਰਨੀ ਪਵੇਗੀ । ਇਹ ਮੁਕਾਬਲੇ ਕਿਸੇ ਵੀ ਪੱਖੋਂ ਆਸਾਨ ਨਹੀਂ ਹੋਣਗੇ । ਉੱਪਰੋਂ ਵੇਖਿਆਂ, ਭਾਵੇਂ ਬਾਕੀ ਟੀਮਾਂ ਕੋਈ ਬਾਹਲੀਆਂ ਨਾਮਵਰ ਜਾਂ ਖਤਰਨਾਕ ਨਹੀਂ ਲੱਗਦੀਆਂ ਪਰ ਉਲਟਫੇਰ ਕਰਨ ਦੀ ਸਮਰੱਥਾ ਇਨਾਂ ਸਭਨਾ ਕੋਲ ਮੌਜੂਦ ਹੈ । ਇਸ ਟੂਰਨਾਮੈਂਟ ਦੀਆਂ ਦੂਜੀਆਂ ਟੀਮਾਂ ਵਿੱਚ ਕੈਨੇਡਾ, ਫਰਾਂਸ, ਇਟਲੀ, ਪੋਲੈਂਡ ਅਤੇ ਸਿੰਗਾਪੁਰ ਸ਼ਾਮਲ ਹਨ । ਇਹ ਵੀ ਧਿਆਨ ਦੇਣ ਵਾਲੀ ਗੱਲ ਹੈ ਕਿ ਇਸ ਵਾਰ, ਹਾਕੀ ਇੰਡੀਆ ਦੇ ਚੋਣਕਾਰ ਕਰਨਲ ਬਲਬੀਰ ਸਿੰਘ, ਬੀ.ਪੀ. ਗੋਵਿੰਦਾ ਅਤੇ ਸਈਅਦ ਅਲੀ ਨੇ ਸਰਕਾਰੀ ਅਬਜ਼ਰਵਰਾਂ ਹਰਵਿੰਦਰ ਸਿੰਘ ਅਤੇ ਦਿਲੀਪ ਟਿਰਕੀ ਨਾਲ ਮਿਲ ਕੇ ਟੀਮ ਦੀ ਚੋਣ ਕੀਤੀ । ਟੀਮ ਵਿੱਚ ਸਾਬਕਾ ਕਪਤਾਨ ਅਤੇ ਭਾਰਤ ਨੂੰ ਪਿਛਲੇ ਸਾਲ ਦਾ ਇੱਕੋ-ਇੱਕ ਵੱਡਾ ਖਿਤਾਬ ਜਿਤਾਉਣ ਵਾਲੇ ਫਾਰਵਰਡ ਰਾਜਪਾਲ ਸਿੰਘ ਨੂੰ ਥਾਂ ਨਹੀਂ ਮਿਲੀ ਜੋ ਕੁਝ ਸਮਾਂ ਪਹਿਲਾਂ ਲੱਗੀ ਸੱਟ ਤੋਂ ਹਾਲੇ ਪੂਰੀ ਤਰ੍ਹਾਂ ਠੀਕ ਨਹੀਂ ਹੋਏ । ਇਸ ਦੇ ਇਲਾਵਾ, ਚੁਣੀ ਗਈ ਅਠਾਰਾਂ ਮੈਂਬਰੀ ਟੀਮ ਵਿਚ ਤਜਰਬੇਕਾਰ ਮਿਡਫੀਲਡਰ ਗੁਰਬਾਜ਼ ਸਿੰਘ ਨੂੰ ਵੀ ਥਾਂ ਨਹੀਂ ਮਿਲ ਸਕੀ । ਟੀਮ ਵਿੱਚ ਡਿਫੈਂਡਰ ਰੁਪਿੰਦਰਪਾਲ ਸਿੰਘ ਅਤੇ ਫਾਰਵਰਡ ਐਸ.ਕੇ. ਉਥੱਪਾ ਦੇ ਰੂਪ ਵਿੱਚ ਦੋ ਨਵੇਂ ਚਿਹਰੇ ਸ਼ਾਮਲ ਕੀਤੇ ਗਏ ਹਨ ਤਾਂ ਜੋ ਭਾਰਤੀ ਟੀਮ ਨੂੰ ਖੇਡ ਦੇ ਹਮਲਾਵਰ ਖੇਤਰਾਂ ਵਿੱਚ ਲੋੜੀਂਦੀ ਰਫਤਾਰ ਮਿਲ ਸਕੇ । ਇਹ ਦੋਵੇਂ ਖਿਡਾਰੀ ਦੱਖਣੀ ਅਫਰੀਕਾ ਖ਼ਿਲਾਫ਼ ਸੀਰੀਜ਼ ਵਿੱਚ ਵੀ ਖੇਡੇ ਸਨ ਅਤੇ ਉਨ੍ਹਾਂ ਨੇ ਆਪਣੇ ਜੋਸ਼ੀਲੇ ਪ੍ਰਦਰਸ਼ਨ ਨਾਲ ਚੋਣਕਾਰਾਂ ਨੂੰ ਪ੍ਰਭਾਵਤ ਕੀਤਾ ਸੀ । ਐਤਕੀਂ ਵੀ ਇਨਾਂ ਖਿਡਾਰੀਆਂ ਨੂੰ ਮੌਕਾ ਦੇਣਾ ਕਾਫੀ ਲਾਹੇਵੰਦਾ ਸਾਬਤ ਹੋ ਸਕਦਾ ਹੈ ।
ਭਾਰਤੀ ਹਾਕੀ ਲਈ ਇੱਕ ਹੋਰ ਚੰਗੀ ਅਤੇ ਉਤਸ਼ਾਹ ਵਧਾਉਣ ਵਾਲੀ ਗੱਲ ਇਹ ਹੈ ਕਿ ਐਤਕੀਂ ਇਸ ਮਹੱਤਵਪੂਰਨ ਮੁਕਾਬਲੇ ਮੌਕੇ ਭਾਰਤੀ ਹਾਕੀ ਟੀਮ ਲਈ ਦੇਸ਼ ਵਿੱਚ ਵਧੀਆ ਮਾਹੌਲ ਬਣ ਰਿਹਾ ਹੈ ਅਤੇ ਇਸ ਮੁਕਾਬਲੇ ਦੌਰਾਨ ਵੀ ਹਾਕੀ ਟੀਮ ਨੂੰ ਦਰਸ਼ਕਾਂ ਵੱਲੋਂ ਚੰਗਾ ਹੁੰਗਾਰਾ ਮਿਲਣ ਦੀ ਉਮੀਦ ਬੱਝੀ ਹੈ । ਇਸ ਤੋਂ ਵੀ ਵੱਡੀ ਗੱਲ ਇਹ ਹੈ ਕਿ ਦੇਸ਼ ਦੀ ਇੱਕ ਨਾਮਵਰ ਕੰਪਨੀ, ਹੀਰੋ ਮੋਟਰਕਾਰਪ ਲਿਮਿਟਿਡ (ਐਚ. ਐਮ. ਸੀ.ਐਲ.) ਨੇ 26 ਫਰਵਰੀ ਤਕ ਹੋਣ ਵਾਲੇ ਪੁਰਸ਼ ਅਤੇ ਮਹਿਲਾ ਕੁਆਲੀਫਾਇੰਗ ਯਾਨੀ ਦੋਹਾਂ ਵਰਗਾਂ ਦੇ ਕੁਆਲੀਫਾਈਂਗ ਟੂਰਨਾਮੈਂਟ ਦਾ ਮੁੱਖ ਪੇਸ਼ਕਰਤਾ ਯਾਨੀ ਸਪਾਂਸਰ ਬਣਨ ਦਾ ਐਲਾਨ ਕੀਤਾ ਹੈ । ਇਸ ਟੂਰਨਾਮੈਂਟ ਨੂੰ ਮੀਡੀਆ ਰਾਹੀਂ ਜ਼ੋਰਾਂ ਸ਼ੋਰਾਂ ਨਾਲ ਪ੍ਰਚਾਰਦੇ ਹੋਏ, ਹੀਰੋ ‘ਐਫ.ਆਈ.ਐਚ. ਰੋਡ ਟੂ ਲੰਡਨ’ ਯਾਨੀ ‘ਭਾਰਤੀ ਹਾਕੀ ਦਾ ਲੰਦਨ ਲਈ ਸਫਰ’ ਦਾ ਨਾਮ ਦਿੱਤਾ ਹੈ । ਯਕੀਨਨ, ਇਹ ਮਾਹੌਲ ਅਤੇ ਉਤਸ਼ਾਹ ਭਾਰਤੀ ਹਾਕੀ ਲਈ ਇੱਕ ਸ਼ੁਭ ਸੰਕੇਤ ਹੀ ਮੰਨਿਆ ਜਾਵੇਗਾ ।
ਇਨਾਂ ਮੁਕਾਬਲਿਆਂ ਲਈ ਚੁਣੀ ਗਈ ਅਠਾਰਾਂ ਮੈਂਬਰੀ ਟੀਮ ਸਬੰਧੀ ਹਾਲਾਂਕਿ ਸ਼ੁਰੂ ਸ਼ੁਰੂ ਵਿੱਚ ਕੁੱਝ ਸ਼ੰਕੇ ਜ਼ਰੂਰ ਪ੍ਰਗਟ ਕੀਤੇ ਗਏ ਸਨ ਏਧਰ ਓਧਰ ਭਾਵੇਂ ਕਿੰਤੂ ਪ੍ਰੰਤੂ ਹੋਏ ਸਨ ਪਰ ਮੁੱਖ ਕੋਚ ਮਾਈਕਲ ਨੋਬਸ ਨੇ ਤਸੱਲੀ ਦਾ ਪ੍ਰਗਟਾਵਾ ਕਰਦਿਆਂ ਕੁਝ ਸੀਨੀਅਰ ਖਿਡਾਰੀਆਂ ਨੂੰ ਬਾਹਰ ਕਰਨ ਤੋਂ ਉਪਜੇ ਵਿਵਾਦ ਨੂੰ ਖਤਮ ਕਰਦਿਆਂ ਕਿਹਾ ਸੀ ਕਿ ਖਿਡਾਰੀਆਂ ਦੀ ਫਾਰਮ ਅਤੇ ਪ੍ਰਦਰਸ਼ਨ ਹੀ ਚੋਣ ਦਾ ਆਧਾਰ ਮੰਨੇ ਗਏ ਹਨ । ਇਹ ਵੀ ਇੱਕ ਚੰਗੀ ਗੱਲ ਹੈ ਕੋਚ ਟੀਮ ਦੀ ਚੋਣ ਤੋਂ ਬਹੁਤ ਖੁਸ਼ ਹਨ ਕਿਉਂਕਿ ਜੇਕਰ ਖਿਡਾਰੀਆਂ ਦੀ ਫਾਰਮ ਅਤੇ ਪ੍ਰਦਰਸ਼ਨ ਦੇ ਆਧਾਰ ਉੱਤੇ ਹੀ ਟੀਮ ਚੁਣੀ ਗਈ ਹੈ ਤਾਂ ਕੋਚ ਕੋਲ ਭਵਿੱਖ ਵਿੱਚ ਸ਼ਿਕਾਇਤ ਦਾ ਕੋਈ ਮੌਕਾ ਨਹੀਂ ਰਹਿੰਦਾ । ਬਿਨਾਂ ਕਿਸੇ ਪੱਖਪਾਤ ਦੇ ਸਰਵੋਤਮ ਟੀਮ ਚੁਣਨਾ ਅਤੇ ਚੋਣਕਾਰਾਂ ਦਰਮਿਆਨ ਸਰਬਸੰਮਤੀ ਨਾਲ ਟੀਮ ਦੀ ਚੋਣ ਹੋਣੀ ਪ੍ਰਬੰਧਕਾਂ ਦਾ ਪਹਿਲਾ ਫਰਜ਼ ਬਣਦਾ ਹੈ । ਤਜਰਬੇਕਾਰ ਅਤੇ ਸਾਬਕਾ ਹਾਕੀ ਓਲੰਪੀਅਨ ਖਿਡਾਰੀਆਂ ਵੱਲੋਂ ਚੁਣੀ ਗਈ ਇਹ ਟੀਮ ਕਿੰਨੀ ਕੁ ਸਹੀ ਹੈ ਇਹ ਤਾਂ ਆਉਂਦੇ ਦਿਨਾਂ ਦੌਰਾਨ ਪਤਾ ਲੱਗ ਜਾਵੇਗਾ ਅਤੇ ਇਹ ਵੀ ਸਾਫ਼ ਹੋ ਜਾਵੇਗਾ ਕਿ ਚੋਣਕਾਰਾਂ ਨੇ ਆਪਣੇ ਕੰਮ ਨੂੰ ਕਿੰਨੀ ਕੁ ਬਾਖੂਬੀ ਨਾਲ ਅੰਜਾਮ ਦਿੱਤਾ ।
ਭਾਰਤੀ ਪੁਰਸ਼ ਟੀਮ ਨੇ ਕੁਆਲੀਫਾਇੰਗ ਟੂਰਨਾਮੈਂਟ ਵਿੱਚ 21 ਨੂੰ ਫਰਾਂਸ, 22 ਨੂੰ ਕੈਨੇਡਾ ਅਤੇ 24 ਨੂੰ ਪੋਲੈਂਡ ਨਾਲ ਭਿੜਨਾ ਹੈ । ਅਖੀਰ ਵਿੱਚ ਅੰਕਾਂ ਦੇ ਅਧਾਰ ਉੱਤੇ ਸਰਬੋਤਮ ਟੀਮਾਂ ਉਲੰਪਿਕ ਵਿੱਚ ਪਹੁੰਚਣਗੀਆਂ ਠੀਕ ਇਨਾਂ ਹੀ ਦਿਨਾਂ ਦੌਰਾਨ ਜਦੋਂ ਪੁਰਖਾਂ ਦੇ ਹਾਕੀ ਓਲੰਪਿਕ ਕੁਆਲੀਫਾਇਰ ਟੂਰਨਾਮੈਂਟ ਦੇ ਮੁਕਾਬਲੇ ਚੱਲਣਗੇ ਤਾਂ ਨਾਲੋ-ਨਾਲ ਭਾਰਤ ਦੀ ਮਹਿਲਾ ਟੀਮ ਵੀ ਆਪਣੇ ਓਲੰਪਿਕ ਕੁਆਲੀਫਾਇਰ ਟੂਰਨਾਮੈਟ ਦੇ ਮੈਚ ਖੇਡੇਗੀ । ਮਹਿਲਾ ਟੀਮ ਦੀ ਕਪਤਾਨ ਅਸੁੰਥਾ ਲਾਕੜਾ ਨੂੰ ਬਣਾਇਆ ਗਿਆ ਹੈ ਜਦਕਿ ਕਿਰਨਦੀਪ ਕੌਰ ਨੂੰ ਉਪ-ਕਪਤਾਨ ਬਣਾਇਆ ਗਿਆ ਹੈ । ਭਾਰਤੀ ਮਹਿਲਾ ਹਾਕੀ ਟੀਮ 26 ਫਰਵਰੀ ਤਕ ਹੋਣ ਵਾਲੇ ਕੁਆਲੀਫਾਇਰ ਵਿਚ ਕੈਨੇਡਾ, ਇਟਲੀ, ਪੋਲੈਂਡ, ਦੱਖਣੀ ਅਫਰੀਕਾ ਤੇ ਯੂਕਰੇਨ ਦੀਆਂ ਟੀਮਾਂ ਨਾਲ ਭਿੜੇਗੀ।
