ਸਰੂਪ ਸਿੰਘ ਸਹਾਰਨ ਮਾਜਰਾ
ਪਿਛਲੇ ਤਿੰਨਾਂ ਦਿਨਾਂ ਤੋਂ ਗੁਜਰਾਤ ਦੇ ਮੁੱਖ ਮੰਤਰੀ ਮੋਦੀ ਸਾਹਿਬ ਪੰਜ ਤਾਰਾ ਵਰਤ ਤੇ ਬੈਠੇ ਰਹੇ ਹਨ। ਮੀਡੀਆ ਵਿੱਚ ਵੀ ਇਹ ਗੱਲ ਉੱਭਰ ਗਈ ਹੈ ਕਿ ਉਹ ਫਿਰਕੂ ਸਦਭਾਵਨਾ ਤੇ ਸ਼ਾਂਤ ਨੂੰ ਸਾਹਮਣੇ ਰੱਖ ਕ ਵਰਤ ਤੇ ਬੈਠੇ ਹਨ। ਬਾਦਲ ਸਾਹਿਬ ਵੀ ਉਨ੍ਹਾਂ ਨੂੰ ਥਾਪੜਾ ਦੇਣ ਉਸ ਸਮੇਂ ਪਹੁੰਚੇ ਹੋਏ ਸਨ। ਟੀ.ਵੀ. ਚੈਨਲਾਂ ਦੇ ਇੱਕ ਹਿੱਸੇ ਨੂੰ ਉਸ ਨਾਲ ਸਬੰਧਿਤ ਖਬਰਾਂ ਨੂੰ ਵਾਰ-ਵਾਰ ਵਿਖਾਇਆ ਲੱਗਦਾ ਹੈ ਕਿ ਗੋਧਰਾ ਕਾਂਡ ਤੋਂ ਪਿੱਛੋਂ ਇੱਕ ਫਿਰਕੇ ਦੀ ਨਸਲਕੁਸ਼ੀ ਕਰਨ ਵਿੱਚ ਕਥਿਤ ਤੌਰ ’ਤੇ ਮੋਦੀ ਸਾਹਿਬ ਦੀ ਮਰਜ਼ੀ ਸ਼ਾਮਲ ਸੀ। ਕੌਮਾਂਤਰੀ ਮੀਡੀਆ ਨੇ ਵੀ ਇਨ੍ਹਾਂ ਖਬਰਾਂ ਨੂੰ ਮਹੱਤਵਪੂਰਨ ਥਾਂ ਦਿੱਤੀ ਸੀ। ਸੋ ਇਸ ਤਰ੍ਹਾਂ ਭਾਜਪਾ ਤੇ ਮੋਦੀ ਦੀ ਸਾਰੀ ਦੁਨੀਆਂ ਵਿੱਚ ਕਿਰਕਰੀ ਹੋਈ ਸੀ। ਉਸ ਸਭ ਨੂੰ ਧੋਣ ਲਈ ਇਹ ਏਅਰ ਕੰਡੀਸ਼ਨ ਪੰਜ ਤਾਰਾ ਵਰਤ ਦਾ ਨਾਟਕ ਗੁਜਰਾਤ ਦੀ ਰਾਜਧਾਨੀ ਅਹਿਮਦਾਬਾਦ ਦੀ ਸਟੇਜ ਤੇ ਖੇਡਿਆ ਗਿਆ ਹੈ। ਨਿਰਪੱਖ ਜਾਂਚ ਕਮਿਸ਼ਨਾਂ ਨੇ ਮੋਦੀ ਨੂੰ ਬਰੀ ਨਹੀਂ ਕੀਤਾ ਸੀ। ਗੋਧਰਾ ਕਾਂਡ-2002 ਵਿੱਚ ਹੋਇਆ। ਮੋਦੀ ਸਾਹਿਬ ਨੂੰ ਸਦਭਾਵਨਾ ਤੇ ਸ਼ਾਂਤੀ ਹੁਣ ਯਾਦ ਆਈ ਹੈ। ਕੀ ਹੁਣ ਤੱਕ ਉਨ੍ਹਾਂ ਦੀ ਜ਼ਮੀਰ ਸੁੱਤੀ ਪਈ ਸੀ। ਹੁਣ ਕਿਸ ਘਟਨਾ ਨੇ ਉਨ੍ਹਾਂ ਦੀ ਜ਼ਮੀਰ ਨੂੰ ਝੰਜੋੜਿਆ ਹੈ? ਲੋਕ ਕਹਿੰਦੇ ਸੁਣੇ ਸਨ ਕਿ ਇਹ ਸਿਆਸਤਦਾਨਾਂ ਦੀ ਜਮੀਰ ਤਾਂ ਹੁੰਦੀ ਹੀ ਨਹੀਂ। ਇਹ ਤਾਂ ਹਰ ਗਲ ਨੂੰ ਵੋਟਾਂ ਦੇ ਚੌਖਟੇ ਵਿੱਚ ਰੱਖ ਕੇ ਹੀ ਦੇਖਦੇ ਹਨ। ਸੋ ਮੋਦੀ ਸਾਹਿਬ ਤੇ ਬੀ.ਜੇ.ਪੀ. ਨੂੰ ਜਮੀਰ ਨੇ ਕੁੱਝ ਨਹੀਂ ਕਿਹਾ, ਸਗੋਂ 2014 ਵਿੱਚ ਆਉਣ ਵਾਲੀਆਂ ਸੰਸਦ ਚੋਣਾਂ ਨੇ ਇਨ੍ਹਾਂ ਦੇ ਮਨ ਵਿੱਚ ਖੋਰੂ ਪਾਇਆ ਹੈ। ਪ੍ਰਧਾਨ ਮੰਤਰੀ ਦੀ ਕੁਰਸੀ ਜੋ ਮੋਦੀ ਸਾਹਿਬ ਨੂੰ ਬਹੁਤ ਦੂਰ ਨਜ਼ਰ ਆ ਰਹੀ ਹੈ। ਅਜਿਹੇ ਨਾਟਕ ਕਰਕੇ ਉਸ ਨੂੰ ਨੇੜੇ ਲਿਆਉਣ ਦੀਆਂ ਕੋਸ਼ਿਸ਼ਾਂ ਹਨ। ਘੱਟ ਗਿਣਤੀ ਇੱਕ ਫਿਰਕੇ ਦੇ ਲੋਕ ਇਨ੍ਹਾਂ ਨਾਟਕਾਂ ਦੇ ਝਾਂਸੇ ਵਿੱਚ ਆਉਣ ਵਾਲੇ ਨਹੀਂ। ਉਹ ਇਸ ਘਿਨਾਉਣੀ ਘਟਨਾ ਨੂੰ ਕਿਵੇਂ ਭੁੱਲ ਸਕਦੇ ਹਨ, ਜਿਸ ਨੇ ਔਰਤਾਂ ਦੇ ਸੁਹਾਗ, ਬੱਚਿਆਂ ਦੇ ਸਿਰਾਂ ਦੇ ਸਾਏ ਤੇ ਬੁੱਢਾਪਿਆਂ ਦੇ ਸਹਾਰੇ, ਇੱਕੋ ਝਟਕੇ ਨਾਲ ਖੋਹ ਲਏ ਸਨ। ਉਨ੍ਹਾਂ ਕਾਤਲਾਂ ਨੂੰ ਬਚਾਉਣ ਲਈ ਜਿਨ੍ਹਾਂ ਲੋਕਾਂ ਨੇ ਅੱਡੀ ਚੋਟੀ ਦਾ ਜੋਰ ਲਗਾਇਆ ਗਿਆ। ਉਨ੍ਹਾਂ ਦੀ ਪੁਸ਼ਤ ਪਨਾਹੀ ਮੋਦੀ ਸਾਹਿਬ ਸਾਰਿਆਂ ਦੇ ਸਾਹਮਣੇ ਠੋਕ ਵਜਾ ਕੇ ਕਰਦੇ ਆਏ ਹਨ। ਮੋਦੀ ਸਾਹਿਬ ! ਜਿੰਨੇ ਮਰਜ਼ੀ ਖੇਖਨ ਕਰ ਲਵੋ ਤੁਸੀਂ ਜਿਸ ਕੁਰਸੀ ਨੂੰ ਹੱਥਿਆਉਣ ਲਈ ਤਰਲੋ-ਮੱਛੀ ਹੋ ਰਹੇ ਹਨ। ਇਹ ਤੁਹਾਡੇ ਹੱਥ ਨਹੀਂ ਆਉਣੀ। ਇੱਕ ਫ੍ਰਿਕੇ ਦੇ ਲੋਕਾਂ ਤੋਂ ਬਿਨਾਂ ਅਮਨ ਪਸੰਦ ਤੇ ਧਰਮ ਨਿਰਪੱਖ ਲੋਕਾਂ ਦੀਆਂ ਨਜ਼ਰਾਂ ਤੁਹਾਡੀਆਂ ਹਰਕਤਾਂ ਤੇ ਟਿੱਕੀਆਂ ਰਹੀਆਂ ਹਨ। ਉਨ੍ਹਾਂ ਨੇ ਜੋ ਫਤਵਾ ਦਿੱਤਾ ਹੈ, ਉਹ ਤੁਹਾਡੀ ਸਿਹਤ ਲਈ ਠੀਕ ਨਹੀਂ ਹੈ। ਇਸ ਲਈ ਭੁੱਲ ਜਾਵੋ ਕਿ ਤੁਸੀਂ ਵੀ ਕਦੀ ਪ੍ਰਧਾਨ ਮੰਤਰੀ ਬਣਨ ਦੇ ਯੋਗ ਹੋਵਾਂਗੇ। ਭਾਰਤ ਦੇ ਲੋਕਾਂ ਦੀ ਯਾਦਾਸ਼ਤ ਇੰਨੀ ਕਮਜ਼ੋਰ ਨਹੀਂ ਕਿ ਤੁਹਾਡੀ ਕਾਰ ਗੁਜਾਰੀ ਨੂੰ
ਭੁੱਲ ਜਾਣ। ਹੁਣ ਪਹਿਲਾਂ ਦੀ ਤਰ੍ਹਾਂ ਰਾਮ ਮੰਦਰ, ਹਿੰਦੂਤਵ ਦਾ ਪੱਤਾ ਵੀ ਮਾਤ ਖਾ ਜਾਵੇਗਾ, ਕਿਉਂਕਿ ਲੋਕਾਂ ਪਾਸ ਇੱਕਾ ਹੈ। ਨਿਕਟ ਭਵਿੱਖ ਵਿੱਚ ਤੁਹਾਡਾ ਸਮਾਂ ਲੱਦਣ ਵਾਲਾ ਹੈ। ਉਸ ਸਮੇਂ ਨਵੀਆਂ ਨਸਲਾਂ ਤੁਹਾਡੀ ਕਾਰਗੁਜਾਰੀ ਦਾ ਹਿਸਾਬ ਮੰਗਣੀਆਂ। ਜੇਕਰ ਤੁਸੀਂ ਉਸ ਵੇਲੇ ਵੀ ਨਾ ਰਹੇ ਤਾਂ ਤੁਹਾਡੀ ਰਾਖ ਦੀ ਢੇਰੀ ਤੋਂ ਵੀ ਹਿਸਾਬ ਲੈਣਗੀਆਂ। ਇਤਿਹਾਸ ਗਵਾਹ ਹੈ ਕਿ ਜਿਸ ਕਿਸੇ ਨੇ ਵੀ ਅੱਤਿਆਚਾਰ ਕੀਤੇ ਅਗਲਿਆਂ ਨੇ ਉਨ੍ਹਾਂ ਦੀਆਂ ਕਬਰਾਂ ਵੀ ਪੁੱਟ ਸੁੱਟੀਆਂ ਸਨ। ਲੱਗਦਾ ਤਾਂ ਨਹੀਂ ਕਿ ਤੁਸੀਂ ਸੱਚੇ ਮਨ ਨਾਲ ਬਿਨਾਂ ਕਿਸੇ ਹੋਰ ਇੱਛਾ ਤੋਂ ਫਿਰਕੂ ਸਦਭਾਵਨਾ ਤੇ ਸ਼ਾਂਤੀ ਲਈ ਵਰਤ ਰੱਖਿਆ ਹੈ। ਜੇਕਰ ਤੁਹਾਡੇ ਮਨ ਦੇ ਕਿਸੇ ਕੋਨੇ ਵਿੱਚ ਆਪਣੀਆਂ ਕੀਤੀਆਂ ਕਰਤੂਤਾਂ ਲਈ ਪਸ਼ਚਾਤਾਪ ਦੀ ਭਾਵਨਾ ਹੈ ਤਾਂ ਪਹਿਲਾਂ ਜਨਤਾ ਦੀ ਕਚਹਿਰੀ ਵਿੱਚ ਆਓ ਤੇ ਆਪਣੀਆਂ ਇਕਬਾਲੀਆ ਬਿਆਨ ਦੇਵੋ ਤੇ ਜਨਤਾ ਜੋ ਸਜਾ ਦੇਵੋ ਉਸ ਨੂੰ ਭੁਗਤੋ। ਅੱਗੇ ਤੋਂ ਉਹ ਸਭ ਕਰਨ ਤੋਂ ਤੌਬਾ ਕਰੋ। ਇਹ ਸਭ ਵੀ ਸੰਸਦ ਦੀਆਂ ਚੋਣਾਂ ਤੋਂ ਪਿੱਛੋਂ ਹੀ ਹੋਵੇ ਨਹੀਂ ਤਾਂ ਜਨਤਾ ਕਹੇਗੀ ਕਿ ਇਹ ਸਭ ਦਿੱਲੀ ਵਾਲੀ ਕੁਰਸੀ ਹਾਸਲ ਕਰਨ ਹੀ ਕੀਤਾ ਹੈ।
