ਰਾਸ਼ਟਰੀ ਤੇ ਅੰਤਰ ਰਾਸ਼ਟਰੀ ਸਮੱਸਿਆਵਾਂ ਦਾ ਯਥਾਰਥ ਪੇਸ਼ ਕਰਦੀ ਪੁਸਤਕਵਿਚਾਰ ਚਰਚਾ
ਡਾ. ਅਜੀਤ ਪਾਲ ਸਿੰਘ ਦੀਆਂ ਲਿਖਤਾਂ ਸਮੇਂ ਦੀ ਤੋਰ ਅਤੇ ਰਾਸ਼ਟਰ ਅਤੇ ਅੰਤਰ ਰਾਸ਼ਟਰੀ ਪੱਧਰ ਦੀਆਂ ਮੂਲ ਉਪਜਦੀਆਂ ਤੇ ਉਪਜਾਈਆਂ ਸਮੱਸਿਆ ਤੋਂ ਪੈਦਾ ਹੋਏ ਲੋਕ ਦੁਖਾਂਤ ਦੇ ਯਥਾਰਥ ਦਾ ਦਰਪਣ ਹਨ। ਲੇਖਕ, ਦੀਰਘ, ਵਿਗਿਆਨਿਕ ਦ੍ਰਿਸ਼ਟੀ ਤੋਂ ਸਾਡੇ ਆਲੇ-ਦੁਆਲੇ ਉਪਜੀਆਂ ਸਮਸਿਆਵਾਂ ਦੇ ਮੂਲ ਕਾਰਨ ਲੱਭਦਾ ਹੈ ਅਤੇ ਸਪੱਸ਼ਟ ਨਿਰਣੇ ਲੈ ਕੇ ਨਿਰਲੇਪ ਫੈਸਲੇ ਦੇ ਕੇ ਇਹ ਸਿੱਧ ਕਰਦਾ ਹੈ ਕਿ ਰਾਜਨੀਤਕ, ਸਮਾਜਿਕ, ਧਾਰਮਿਕ ਅਤੇ ਸੱਭਿਆਚਾਰਕ ਖੇਤਰ ਵਿੱਚ ਜੋ ਅਨਿਆਏ ਹੈ, ਭ੍ਰਿਸ਼ਟਾਚਾਰ ਹੈ, ਉਦਯੋਗਿਕ ਘਰਾਣਿਆਂ ਦਾ ਵਿਕਾਸ ਹੈ। ਉੱਨਤੀ ਦੇ ਨਾਂ ਉੱਪਰ ਜੋ ਕਾਰਪੋਰੇਟ ਜਗਤ ਅਥਵਾ ਸਰਮਾਏਦਾਰ ਉਦਯੋਗਿਕ ਘਰਾਣਿਆਂ ਦੀਆਂ ਲੋਕ ਦੁਸ਼ਮਣ ਚਾਲਾਂ ਕਾਰਨ ਉਪਜੀਆਂ ਸਮੱਸਿਆਵਾਂ ਹਨ। ਉਨ੍ਹਾਂ ਕਾਰਨ ਲੋਕ ਸਮਾਜ ਲੋਕ ਸੱਭਿਆਚਾਰ ਤੋਂ ਲੈ ਕੇ ਜੀਵਨ ਵਿੱਚ ਜੋ ਦੁਖਾਂਤ ਪੈਦਾ ਹੋ ਰਹੇ ਹਨ। ਲੇਖਕ ਨੇ ਉਨ੍ਹਾਂ ਸਬੰਧੀ ਨਿਡੱਰ ਹੋ ਕੇ ਕਲਮ ਚਲਾਈ ਹੈ। ਭਾਵੇਂ ਇਹ ਲੇਖ ਅਖਬਾਰੀ ਲੇਖ ਜਾਪਦੇ ਹਨ ਪਰੰਤੂ ਇਨ੍ਹਾਂ ਦੀ ਮਹੱਤਤਾ , ਚਿੰਤਨ ਕਰਨ ਦੇ ਚੇਤਨ ਹੋਣ ਦੀ ਸਥਾਈ ਭਾਵਨਾ ਦਾ ਪ੍ਰਤੀਮਾਨ ਹੈ। ਲੇਖਕ ਨੇ ਚਲੰਤ ਇੱਕੀਵੀਂ ਸਦੀ ਦੇ ਸੱਭਿਆਚਾਰ ਵਿੱਚ ਤਕਨਾਲੋਜੀ, ਉਦਯੋਗਿਕ ਅਤੇ ਸਰਮਾਏਦਾਰੀ ਪ੍ਰਬੰਧਨ ਦੇ ਕੌੜੇ ਸੱਚ ਦਾ ਉਲੇਖ ਕਰਦਾ ਹੈ, ਜਿਵੇਂ ਵੱਧਦੇ ਕੈਮਰੇ ਤੇ ਘੱਟਦੇ ਸਮਾਚਾਰ ਪਿਛਲੇ ਦਰਵਾਜਿਉਂ ਬੀ.ਟੀ. ਤਿਆਰੀ, ਸਾਹਿਤਕ ਸਥਾਵਾਂ ਦੀ ਰਾਜਨੀਤੀ, ਸੂਚਨਾ ਦਾ ਅਧਿਕਾਰ, ਇੱਕ ਕਾਗਜ਼ੀ ਹੱਥਿਆਰ, ਪੂੰਜੀਵਾਦ ਦਾ ਇਨਸਾਫ, ਕਰੋੜਾਂ ਦੀ ਖੇਡ, ਅਰਬਾਂ ਦਾ ਮੁਨਾਫਾ, ਆਈ.ਪੀ.ਐਲ. ਦੀ ਅਸਲੀਅਤ, ਅਦਾਲਤਾਂ, ਡੂੰਘਾ ਆਰਥਿਕ ਸੰਕਟ , ਫਿਰਕਾ ਪ੍ਰਸਤੀ, ਖਬਰਾਂ ਤੇ ਪੈਸੇ, ਭਾਰਤ ਵਿੱਚ ਦਲਾਲ, ਪੁਲਿਸ ਤੇ
ਅਪਰਾਧ, ਰਾਸ਼ਟਰ ਮੰਡਲ ਖੇਤਾਂ ਦਾ ਲਾਭ ਕਿਸ ਨੂੰ, ਫਿਰਕਾ ਪ੍ਰਸਤੀ, ਫਰਜ਼ੀ ਪੁਲਿਸ ਮੁਕਾਬਲੇ, ਪੂੰਜੀਵਾਦੀ ਨਿਆਂ, ਨਸਲਵਾਦ, ਜੇਲ੍ਹ ਪ੍ਰਬੰਧ ਆਦਿ ਲੇਖ। ਅਜਿਹੇ ਹੋਰ ਲੇਖ, ਸਾਡੇ ਲੋਕਾਂ ਦੇ ਅਜੋਕੇ ਜੀਵਨ ਦੇ ਭੱਖਦੇ ਮਸਲੇ ਹਨ, ਜਿਨ੍ਹਾਂ ਸਬੰਧੀ ਸੋਚਣ ਦਾ ਹਰ ਹੋਸ਼ ਮਦ ਵਿਅਕਤੀ ਨੂੰ ਹੱਕ ਹੈ ਤੇ ਸੂਝਵਾਨ ਵਿਅਕਤੀ ਦਾ ਫਰਜ਼ ਹੈ ਕਿ ਉਹ ਸਾਡੇ ਆਲੇ-ਦੁਆਲੇ ਪੈਦਾ ਕੀਤੇ ਪਸਰੇ ਹਨ੍ਹੇਰੇ ਨੂੰ ਫੈਲਾਉਣ ਵਾਲਿਆਂ ਦੀਆਂ ਜਲੀਲ ਹਰਕਤਾਂ ਨੂੰ ਜਾਣੇ ਤੇ ਪਹਿਚਾਣੇ, ਸੁਚੇਤ ਹੋ ਕੇ ਆਪਣੇ ਜੀਵਨ ਅੰਦਰ ਨਵੀਂ ਵਿਗਿਆਨਿਕ ਸੋਚ ਦਾ ਸੰਚਾਰਣ ਕਰੇ। ਆਮ ਆਦਮੀ ਲੁਟੀਂਦਾ ਜਾ ਰਿਹਾ ਹੈ। ਵਿਸ਼ੇਸ਼ ਬਣੇ ਉਦਯੋਗਪਤੀ, ਸਰਮਾਏਦਾਰ ਅਤੇ ਪ੍ਰਬੰਧਨ ਅਦਾਰਿਆਂ ਦੇ ਮਾਲਕ,ਵਿਕਾਸ ਦੇ ਨਾਂ ਉੱਪਰ ਲੁੱਟ ਰਹੇ ਹਨ। ਚਾਰੇ ਪਾਸੇ ਤਨਾਉ ਹੈ। ਭ੍ਰਿਸ਼ਟਾਚਾਰ ਹੈ। ਬਿਮਾਰੀ ਹੈ, ਗਰੀਬੀ ਹੈ। ਡਾ. ਅਜੀਤ ਪਾਲ ਸਿਘ ਸ਼ੀਸਾ ਬੋਲਦਾ ਹੈ ਦੇ ਇਨ੍ਹਾਂ ਛੋਟੇ ਵੱਡੇ 52 ਲੇਖਾਂ ਵਿੱਚ ਦੁੱਧ ਦਾ ਦੁੱਧ ਤੇ ਪਾਣੀ ਦਾ ਪਾਣੀ ਵੱਖ ਕਰਕੇ ਆਪਣੇ ਪਾਠਕਾਂ ਅੰਦਰ ਅਸਲੀਅਤ ਦਾ ਚਾਨਣ ਭਰਦਾ ਹੈ। ਇਹ ਲੇਖ ਸਮੇਂ ਦਾ ਸੱਚ ਕੀ ਹੈ? ਲੋਕ ਦੁਸ਼ਮਣ ਕੌਣ ਹਨ? ਸਮੱਸਿਆਵਾਂ ਦਾ ਪੈਦਾ ਕਰਨ ਵਾਲੇ ਭ੍ਰਿਸ਼ਟ ਲੋਕ ਕੌਣ ਹਨ। ਦਿਖਾਵੇ ਦੀ ਰਾਜਨੀਤੀ ਕੀ ਹੈ? ਆਦਿ ਭੱਖਦੇ ਮਸੱਲਿਆਂ ਦਾ ਮੁਲਾਂਕਣ ਪੇਸ਼ ਕਰਦੇ ਹਨ। ਪੰਜਾਬੀ ਪਾਠਕਾਂ ਨੇ ਇਨ੍ਹਾਂ ਲੇਖਾਂ ਨੂੰ ਪੜ੍ਹ ਕੇ ਪਹਿਲਾਂ ਨਾਲੋਂ ਜਾਗ੍ਰਿਤ ਸੁਚੇਤ ਅਤੇ ਬਲਵਾਨ ਵਿਗਿਆਨਿਕ ਦ੍ਰਿਸ਼ਟੀ ਦੇ ਮਾਲਕ, ਬਣ ਸਕਦੇ ਹਨ। ਇਹ ਮੇਰਾ ਵਿਸ਼ਵਾਸ ਹੈ।
ਡਾ. ਅਮਰ ਕੋਮਲ
093175-47660
